Կլիմայական փոփոխությունները աննախադեպ սպառնալիք են մարդկության համար, ու գիտական փաստերն այդ կապակցությամբ ոչ մի կասկած չեն թողնում։ Այս մասին հայտնել է ՄԱԿ գլխավոր քարտուղար Անտոնիու Գուտերեշը՝ դիմելով կլիմային նվիրված բարձր մակարդակի նիստի մասնակիցներին, Նյու Յորքում։
Գուտերեշը հիշեցրել է, որ անցած տարին ամենաշոգն է եղել մետեոդիտարկումների պատմության մեջ ու մթնոլորտում ածխաթթու գազի խտությունը կրիտիկական նիշերի է հասել։ Արկտիկան հալչում է աննախադեպ տեմպերով, օվկիանոսի մակարդակը սրընթաց բարձրանում է ու ըստ Գուտերեշի, դա անկասկած մարդու գործունեության հետեւանքն է։
Նրա խոսքով կլիմայական փոփոխությունները սպառնում են ափամերձ պետությունների պարենամթերային կայունությանը , տնտեսական զարգացմանն ո ւ հենց գոյությանը։ Ջրի պակասը կարող է հակամարտությունների պատճառ դառնալ եւ զինվորականները վաղուց են ընդունել , որ կլիմայական փոփոխությունները սպառնալիք են անվտանգության համար։
«Աշխարհը առաջ է շարժվում կանաչ տնտեսության ճանապարհով,- նշել է Անտոնիու Գուտերեշը,- Կառավարություններն ու բիզնես շրջանակները ավելի հստակ են գիտակցում, որ մենք չպետք է ընտրենք առողջ շրջակա միջավայրի ու առողջ տնտեսության միջեւ։ Մենք կարող ենք ապահովել թե մեկը, թե մյուսը»։
ՄԱԿ ղեկավարը շեշտել է, որ կլիմայական փոփոխությունների դեմ պայքարը ոչ թե քաղաքականության, այլ մարդկության գոյատեւման հարցն է։
