Չեմ կարծում, որ «Ծառուկյան» դաշինքը արմատական ընդդիմադիր է: Այդ մասին այսօր՝ մարտի 23-ին ՀՀԿ Գործադիր մարմնի նիստից հետո լրագրողներին ասել է ՀՀԿ մամուլի քարտուղար Էդուարդ Շարմազանովը՝ պատասխանելով Գագիկ Ծառուկյանի հետ կոալիցիա կազմելու հավանականության մասին հարցին:
Դիտարկմանը, թե Գագիկ Ծառուկյանը հայտարարել է, որ եթե 15 պահանջները կատարեն, համաձայն է կոալիցիա կազմել, Շարմազանովն ասել է. «Հայաստանի Հանրապետական կուսակցությունը որեւէ կուսակցության հետ, բացառությամբ ՀՅԴ-ի, որի հետ այս պահին գտնվում է կոալիցիայում, հետընտրական զարգացումների հարց չի քննարկել»:
Նա միաժամանակ հավելել է. «Չեմ կարծում, որ «Ծառուկյան» դաշինքը արմատական ընդդիմադիր են: Մեր քաղաքացիներից շատերը, այդ թվում՝ միգուցե այդ դաշինքում ընդգրկված որոշ գործիչներ այդ դաշինքը ընդդիմադիր չեն համարում: Ինչ վերաբերում է ապագայում կկազմե՞նք, թե՞ ոչ, ամեն ինչ ցույց կտան ապրիլի 2-ի արդյունքները»:
Շարմազանովն ասել է, որ դրանից հետո կֆիքսեն.
Ա. Ո՞ր ուժերն են իրավունք ձեռքբերել խմբակցություն կազմել խորհրդարանում,
Բ. Կա՞ ուժ, որը կարող է մեծամասնություն կազմել խորհրդարանում:
«Կոալիցիան ինքնանատակ չի լինելու: Բոլոր կոալիցիաների, մանավանդ խորհրդարանական կառավարման համակարգում, հիմքը պետք է լինի ընդհանուր ծրագրային տեսլականը: ՀՀԿ-ն առանց ընդհհանուր տեսլականի չի պատրաստվում որեւէ ուժի հետ կոալիցիա կազմել»,- նշել է ՀՀԿ խոսնակը՝ միաժամանակ նշելով, որ եթե կոալիցիայի պահանջը լինի, քննարկումներ կանեն: