Առջեւում է մի աննախադեպ շրջան, եւ կիսատ մնացած հաղթանակները պետք է ի կատար ածվեն այս անգամ։ Այս մասին այսօր` մարտի 23-ին, լրագրողների հետ զրույցում հայտարարեց «Ժառանգություն» կուսակցության անդամ, «Օհանյան–Րաֆֆի–Օսկանյան» դաշինքի անդամ Րաֆֆի Հովհաննիսյանը։
«Մեր դաշինքը հանձնառու է մինչեւ վերջ պաշտպանել գեներալ Բաբայանի իրավունքները, թեեւ ինքը մեր պաշտպանության կարիքը չունի, եւ ավելին՝ կիսատ մնացած հաղթանակները պատրաստ ենք ի կատար ածել այս անգամ։ Մեր առջեւում է աննախադեպ մի շրջան։ Հայաստանը, հայ մարդը իր ամբողջությամբ պետք է ազատագրվի, այս ազատագրման օրը եթե ընտրությամբ է, կլինի ապրիլի 2–ը, եթե ոչ՝ ապրիլի 3–ից սկսած»,–հայտարարեց Րաֆֆի Հովհաննիսյանը։
Ըստ նրա ՝ Արցախի պաշտպանական բանակի նախկին հրամանատար, դաշինքի համակիր Սամվել Բաբայանի ձերբակալությունը մատնել է իշխանության վախը։
«Բաբայանը վտանգավոր էր իր անձով, մեր նկատմամբ իր համակրանքով։ Այս քայլը մատնում է կեղծ իշխանությունների վախը, փորձում են վախեցնել դաշինքին, ժողովրդին, բայց չի հաջողվի, իրենք են վախի մեջ։ Այս անգամ ունենք այն հավաքականը, որը գնալու է մինչեւ վերջ։ Պիտի օգտագործենք ընդվզման եւ ինքնապաշտպանության բոլոր եղանակները՝ ապահովելու հայ ժողովրդի քվեն ու հայ ժողովրդի արժանապատվությունը»։
Հարցին՝ ինչու է մամուլում շրջանառվում տեղեկություն, թե ՕՐՕ դաշինքը «Սասնա ծռեր–2» է ծրագրում, արդյոք քննարկել են ընդվզման նման սցենար եւ ինչո՞վ էր պայմանավորված այն, որ Ժիրայր Սեֆիլյանը եւ «Սասնա ծռերը» Ջրառատի դեպքերից հետո հայտարարեցին, որ սատարում են դաշինքին, Րաֆֆի Հովհաննիսյանը պատասխանեց. «Նման միջոցառում չկար, արյունահեղության, ճնշման բոլոր նախաձեռնությունները պարոն Սարգսյանի եւ իր կուսակցության կողմից են, մեզ մնում էր ինքնապաշտպանվել՝ որպես քաղաքացիներ, բայց այն, որ զորակցություն ենք ստանում մեր դիրքորոշման համար ամենատարբեր անկյուններից, այդ թվում՝ Ժիրայր Սեֆիլյանից եւ մյուս քաղբանտարկյալներից, ցույց է տալիս, որ այս անգամ հանձնառու ենք փողոցում, ընտրատեղամասում ու բանտում տանել մեր պայքարը, որ ազատվենք այս ռեժիմից»։
Րաֆֆի Հովաննիսյանը կրկին պնդեց, որ 2013-ին մինչեւ վերջ չի գնացել արյունահեղությունից խուսափելու համար: Հարցին՝ ի՞նչ երաշխիք կա, որ այս անգամ էլ չի լինի արյունահեղության սպառնալիք, նա պատասխանեց. «Այն ժամանակ չկային Օհանյանը եւ Օսկանյանը, իսկ հիմա պատմության անիվն անսպասելի այնպես է բերել, որ հասունացել է։ Երանի դա լիներ 4 տարի առաջ։ Հիմա արդեն կա այդ կրիտիկական զորակցությունը Սփյուռքից, ներսից ու դրսից։ Եթե մի քանի տարի առաջ ձեր ներկայությամբ ես մենակ էի, ապա հիմա արդեն այս մենակության զգացումը չկա, կան Օհանյանը, Օսկանյանը, ազատամարտիկները մտավորականների մի ողջ հասարակություն, որը տեսնում է համապարփակ պինդ հետեւողական միասնություն»,–հայտարարեց «Ժառանգություն» կուսակցության առաջնորդը։
Ի դեպ, նա շեշտեց, որ Սամվել Բաբայանի հետ հետընտրական զարգացումները հարցը չեն քննարկել։
