«Օհանյան–Րաֆֆի–Օսկանյան» դաշինքի առաջանորդ, պաշտպանության նախկին նախարար Սեյրան Օհանյանին իշխանությունները եւ համապատասխան ծառայությունները հետապնդում են։ Լրագրողների հետ ճեպազրույցում այս մասին հայտարարեց դաշինքի ներկայացուցիչ, «Ժառանգություն» կուսակցության առաջնորդ Րաֆֆի Հովհաննիսյանը։ Ըստ նրա՝ իշխանության թիրախում միայն Արցախի պաշտպանական բանակի նախկին հրամանատար, դաշինքի համակիր Սամվել Բաբայանը չէ, որին երեկ ձերբակալել են։
Այնուամենայնիվ, Րաֆֆի Հովհաննիսյանը դժվարացավ կոնկրետ նշել, թե ինչպես է արտահայտվում այդ հետապնդումը:
«Ես վստահ եմ, որ Սեյրան Օհանյանը հիմա փաստացի հետապնդման մեջ է, համապատասխան օրգանների, իշխանությունների կողմից, նաեւ իշխանամերձ, կուսակցապետականամերձ լրատվամիջոցների կողմից, ինչպես Սամվել Բաբայանն էր հետապնդվում։ Ես ու իմ ընտանիքը ունեցել ենք նման փորձառություններ եւ կարելի է սպասել, որ ցանկացած մեկը թիրախում կհայտնվի՝ գյուղացի կլինի, թե ազգային հերոս, սրանց համար ինչ տարբերոթյուն։ Ես պարոն Օհանյանի անունից չեմ խոսում, ես պարզապես որպես քաղաքացի կիսվում եմ ձեզ հետ»,–ասաց Րաֆֆի Հովհաննիսյանը:
Նրա խոսքով՝ դաշինքը սպառնալիք է իշխանության համար, ինչի դեմ կանխարգելիչ գործողություններ են սկսել ձերբակալություններով։
Անդրադառնալով Սեյրան Օհանյանի ձերբակալության հավանականությանը, Հովհաննիսյանը զգուշացրեց իշխանությանը. «Թող ռիսկ անեն ձերբակալեն»։