Եթե խորհրդարանական ընտրությունները կայանային առաջիկա կիրակի, ապա Հայաստանի Հանրապետական կուսակցության օգտին կքվեարկեր հարցվածների 29,4 տոկոսը: Մարտի 24-ին՝ մամուլի ասուլիսի ժամանակ այս մասին հայտարարեց Հայաստանում Gallup International Association-ի ներկայացուցչության ղեկավար Արամ Նավասարդյանը՝ ներկայացնելով մարտի 12-ից 19-ը Հայաստանի 10 մարզերում եւ Երեւանի բոլոր շրջաններում անցկացված նախընտրական սոցիոլոգիական հարցումների տվյալներով քաղաքական կուսակցությունների եւ դաշինքների ցուցանիշները:
Նրա խոսքով՝ «Ծառուկյան» դաշինքի օգտին կքվեարկեր 28,2 տոկոսը: «Ելք» դաշինքի օգտին կքվեարկեր հարցվածների 6,1 տոկոսը, Դաշնակցության օգտին՝ 4,8 տոկոսը: Հաջորդող ցուցանիշներն այսպիսին են՝ «Ազատ դեմոկրատներ»՝ 4,4 տոկոս, «Հայկական վերածնունդ»՝ 3,4 տոկոս, «Կոնգրես-ՀԺԿ»՝ 2,9 տոկոս, «Օհանյան-Րաֆֆի-Օսկանյան»՝ 2,5 տոկոս, Հայաստանի կոմունիստական կուսակցություն՝ 1,2 տոկոս:
Նա այնուհետեւ հավելեց, որ Հանրապետական կուսակցությունն իր ցուցանիշով մի փոքր է առաջ անցել «Ծառուկյան» դաշինքից: Արամ Նավասարդյանի կարծիքով՝ այս հարցում ՀՀԿ-ի համար դրական դեր է ունեցել նրա նախընտրական արշավին վարչապետ Կարեն Կարապետյանի մասնակցությունը:
