Բրիտանական ոստիկանությունը եւս երկու «կարեւոր ձերբակալություն» է կատարել Լոնդոնում ահաբեկչության հետ կապված: Այսպիսով, ընդհանուր առմամբ, հետաքննության շրջանակում ձերբակալվել է 10 մարդ, մեկ կին արդեն գրավի դիմաց ազատ է արձակվել, հաղորդում է BBC-ն:
Ուրբաթ գիշեր ահաբեկչության զոհերի թիվը հասել է 5-ի, ներառյալ՝ հարձակվողը: Հաղորդվում է, որ մի քանի տասնյակ մարդ դեռ մնում է հիվանդանոցներում, երկուսի վիճակը ծայրահեղ ծանր է:
Հիշեցնենք, որ մարտի 22-ին Լոնդոնի կենտրոնում անհայտ տղամարդը մեքենայով վրաերթի էր ենթարկել անցորդներին, իսկ հետո դանակով հարձակվել ոստիկանի վրա: Հարձակվողին գնդակահարել են, իսկ վիրավոր ոստիկանն ավելի ուշ մահացել է հիվանդանոցում:
Բրիտանական ոստիկանությունը հայտնել է ահաբեկչի անունը: Պարզվել է, որ նա Բրիտանիայի քաղաքացի, 52-ամյա Հալիդ Մասուդն է: