4 տարի առաջ զինվորական ծառայության պարտականությունները կատարելիս հրազենային վնասվածք ստացած Մհեր Պետրոսյանը, որի հետագա բուժումը կազմակերպվում է Կառավարության տրամադրած 26 մլն դրամով, դեռեւս Հայաստանում է. Գերմանիայում վիրահատությունը նշանակված է կամ ապրիլի 11-ին, կամ 24-ին, սակայն անհրաժեշտ է եւս 8 մլն դրամ:

NEWS.am-ին հայտնի դարձավ, որ այժմ Կառավարությունը քննարկում է զինծառայողի բուժման համար լրացուցիչ գումար տրամադրելու հարցը: Ամենայն հավանականությամբ, Մհերի վիրահատությունը կկատարվի ապրիլի 24-ին:

Հիշեցնենք, որ զինծառայողը վիրավորվել էր 2013թ. հունվարի 14-ին ծառայակցի արձակած կրակոցից: ՀՀ ՊՆ զորամասի մարտական հենակետերից մեկի խոհանոցում շարքային Տիգրան Բալասանյանը Պետրոսյանին դեպքի օրն ասել էր. «Պատկերացրու` դու թուրք լինեիր, ու ես քեզ գերի վերցնեի, հրամանատարության կողմից կխրախուսվեի»: Այնուհետեւ կարծելով, թե ինքնաձիգի փակաղակի ապահովիչը գտնվում է չկրակելու դիրքում, Տիգրանը ցանկացել է կատակել համածառայակից, նույն հենակետի կրտսեր սերժանտ Մ. Պետրոսյանի հետ, իսկ կատակն առավել համոզիչ դարձնելու համար փորձել է կատարել զենքի լիցքավորման իմիտացիա, այն է` փակաղակը փոքր ինչ հետ է քաշել, արդյունքում ինքնաձիգը լիցքավորվել ու ձգանը սեղմելուց հետո կատարվել են երկու կրակոցներ, դրանով Մ. Պետրոսյանի առողջությանն անզգուշությամբ պատճառել գլխի հրազենային, գնդակային, թափանցող, միջանցիկ վիրավորում` ուղեկցված աջ կիսագնդի ուղեղանյութի ջնջխում:

Արարատի եւ Վայոց ձորի մարզերի ընդհանուր իրավասության դատարանը Բալասանյանին մեղավոր էր ճանաչել եւ դատապարտել 2.5 տարվա ազատազրկման` պատժի սկիզբը հաշվելով 2013թ. հունվարի 14-ից: Ստացվում է, որ Բալասանյանն արդեն ազատության մեջ է, իսկ Պետրոսյանը արդեն ավելի քան 4 տարի պայքարում է ապրելու համար:

Պետրոսյանները նաեւ քաղաքացիական հայց են ներկայացրել, որն ընթացքի մեջ է: Տիգրան Բալասանյանի ընտանիքն առ այսօր ոչնչով Պետրոսյաններին չի օգնել: