ԵՏՄ-ին անդամակցությունը չի կարող տալ Հայաստանին նույնը, ինչը կարող էր տալ ԵՄ-ում ասոցացված անդամակցությունը։ Այս մասին հայտարարել է «Ազատ դեմոկրատներ»-ի ներկայացուցիչ Անժելա Խաչատրյանը՝ քաղաքական ուժերի ներկայությամբ բանավեճի ընթացքում։
Քաղաքական գործիչը համաձայնել է, որ ազնիվ չէր լինի բոլոր խնդիրներում՝ ՀՀ-ում տիրող կոռուպցիայի եւ ստվերային տնտեսության մեջ մեղադրել ԵՏՄ-ին։ «Մենք դա չենք պնդում։ Պարզապես ասում ենք, որ ԵՏՄ-ն չի կարող տալ այն, ինչ կաող է տալ ԵՄ-ում ասոցացված անդամակցությունը»։
Հետո քաղաքական գործիչը հիշեցրել է Երեւանում ապրիլյան իրադարձություններից հետո ԵՏՄ վարչապետների հանդիպումը չեղարկելու մասին։
«Ռուսաստանն Ադրբեջանին սպառազինության խոշորագույն մատակարարն է։ Երկրորդը Բելառուսն է։ Հայտնի բլոգերի նկատմամբ Բելառուսի պահվածքի մասին ընդհանրապես չեմ ցանկանում խոսել։ Այսինքն՝ ԵՏՄ երկրները եւս տառապում են կոռուպցիայից եւ մարդու իրավունքների խախտումից»,- հստակեցրել է Անժելա Խաչատրյանը՝ հավելելով, որ եթե Հայաստանը որպես օրինակ վերցնում է Եվրոպայի քաղաքական հեռանկարները, ինչն է նրան խանգարում առաջնորդվել տնտեսության մեջ եվրոպական նպատակներով։