Ներքաղաքական թոփ թեման շարունակում է մնալ Սամվել Բաբայանի ձերբակալությունը: Վաղը լրանում է 72 ժամը, սակայն նրան դեռ մեղադրանք չեն առաջադրել: «Օհանյան-Րաֆֆի-Օսկանյան» դաշինքը, որի ստվերային համակարգողն է համարվում պաշտպանության բանակի նախկին հրամանատարը, հայտարարեց, որ Բաբայանը քաղաքական հետապնդման է ենթարկվում եւ իրենք մինչեւ վերջ կանգնելու են նրա կողքին:

Ավելի ուշ լրագրողների հետ ճեպազրույցում Րաֆֆի Հովհաննիսյանը հայտարարեց, որ Սամվել Բաբայանի ձերբակալությունը մատնում է իշխանությունների վախը: Նա վստահեցրեց, որ Սեյրան Օհանյանը նույնպես այժմ քաղաքական հետապնդման է ենթարկվում: Այնուամենայնիվ, չմասնավորեցրեց, թե կոնկրետ ինչպես է նա հետապնդվում: Լրագրողների հարցին, թե հնարավո՞ր է Սեյրան Օհանյանը նույնպես ձերբակալվի, պատասխանեց կարճ: «Ժառանգության» առաջնորդը բացահայտեց իրենց ծրագրերը. եթե իրենք չհաղթեն, հետընտրական զարգացումներ են լինելու: Րաֆֆի Հովհաննիսյանը պնդում է, որ այս անգամ մինչեւ վերջ է գնալու, նախորդ անգամվա պես պայքարից հետ չի կանգնելու: Լրագրողներից մեկը հեգնեց՝ հիշեցնելով Ծիծեռնակաբերդում աղոթքը ոստիկանապետի հետ: Րաֆֆի Հովհաննիսյանի թիմակիցներից մեկի նյարդերը տեղի տվեցին:

Իշխող կուսակցությունն ամեն կերպ հերքում է Բաբայանի ձերբակալության քաղաքական շարժառիթները: Ավելին, Շարմազանովը նախօրեին կարծիք է հայտնել, որ ՕՐՕ դաշինքը միտումնավոր է քաղաքականացնում հարցը՝ դիվիդենտներ շահելու համար, մինչդեռ, նրա խոսքով, հարցը միայն իրավական տիրույթում է:

Ներքաղաքական մյուս ինտրիգը. արդյո՞ք «Ծառուկյան» դաշինքն ու Հանրապետականը կոալիցիա կկազմեն: Շարմազանովն ասել է, որ նման հարց իրենք չեն քննարկել, բայց ընտրություններից հետո, երբ պարզ դառնան արդյունքները, կորոշեն, թե որ ուժերի հետ կարելի է կոալիցիա կազմել: Ըստ էության՝ այս հնարավորությունը չի բացառել, հատկապես որ, նրա խոսքով, ոչ մեկի համար գաղտնիք չէ, որ «Ծառուկյան» դաշինքը բոլորովին էլ ընդդիմադիր չէ:

Օրերս Գագիկ Ծառուկյանը չէր բացառել այս հնարավորությունը, սակայն ժամեր անց Նաիրա Զոհրաբյանը հայտարարել էր, որ Հանրապետականի հետ կոալիցիան անհնար է: Այսօր արդեն Ծառուկյանն Արարատի մարզում ընտրողների հետ հանդիպմանը սրբագրեց ինքն իրեն. լրագրողներն իրեն լավ չեն հասկացել, ինքը կոալիցիա Հանրապետականի հետ չի կազմի:

Արարատի մարզում Ծառուկյանն այսօր ակտիվ քարոզարշավ է իրականացրել իր փեսայի՝ Հովիկ Աբրահամյանի որդու օգտին: Արգամ Աբրահամյանն ամենուր ուղեկցում էր Ծառուկյանին, վերջինն էլ ամբիոնից գովաբանել է փեսային, իսկ ավելի ուշ ընտրողներից մեկի հետ զրույցում կանգնել իր խնամի Հովիկ Աբրահամյանի թասիբին: Վեդիի բնակիչը դժգոհել է, որ Հովիկ Աբրահամյանը մարզպետ, ապա վարչապետ եղած տարիներին մարզի համար ոչ մի լավ բան չի արել, Ծառուկյանը դրա մեջ պատվեր է տեսել:

Gallup International-ի հայաստանյան ներկայացուցչությունը Հայաստանի մարզերում եւ Երեւանում սոցհարցում է անցկացրել եւ պարզել, որ եթե խորհրդարանական ընտրությունները կայանային առաջիկա կիրակի, ապա Հանրապետական կուսակցության օգտին կքվեարկեր հարցվածների 29.4%-ը: ՀՀԿ-ին չնչին տարբերությամբ հետեւում է «Ծառուկյան» դաշինքը, որի օգտին կքվեարկեր 28.2%-ը: «Ելք» դաշինքի օգտին կքվեարկեր հարցվածների 6.1%-ը, ՀՅԴ-ի օգտին՝ 4.8%-ը, «Ազատ դեմոկրատների»՝ 4.4%-ը, «Հայկական վերածննդի»՝ 3.4%-ը, «Կոնգրես-ՀԺԿ»-ի՝ 2.9%-ը, «Օհանյան-Րաֆֆի-Օսկանյան» դաշինքի՝ 2.5%-ը, Կոմկուսի օգտին՝ 1.2%-ը:

Բացի այդ, արդյունքների համաձայն, ամենամեծ թվով ընտրողները՝ հարցվածների 76.4%-ը, ծանոթ են «Ծառուկյան» դաշինքի ծրագրին, ամենաքիչը՝ 8.2%-ը, «Կոնգրես-ՀԺԿ»-ի նախընտրական ծրագրին: Իշխող Հանրապետականի նախընտրական ծրագիրը ճանաչվածությամբ երկրորդն է՝ 65.1%-ով: Իսկ Հանրապետական կուսակցության քարոզարշավին վարչապետ Կարեն Կարապետյանի մասնակցությունը հարցման մասնակիցների 67.1%-ը դրական է գնահատում:

Կոտայքի մարզի Նոր Գեղի գյուղի թթվածնային կայանում բալոնի լիցքավորման ժամանակ պայթյուն է տեղի ունեցել: Պատահարի պատճառների մասին վարկածներ դեռեւս չկան: Փլատակների տակից դուրս են բերել աշխատակցի՝ Արմենակ Ազարյանի դին: Նա Նոր Գեղիի բնակիչ է, կայանում թթվածնային բալոններն էր լիցքավորում: Ազարյանն ամուսնացած էր, երկու երեխա ունի: Պայթյունի հետեւանքով մեկ մարդ էլ վնասվածքներով հիվանդանոց է տեղափոխվել: Դեպքի վայրում է եղել նաեւ արտակարգ իրավիճակների նախարար Դավիթ Տոնոյանը:

Մոսկվայում 95 տարեկանում մահացել է հայտնի օդաչու Ստեփան Միկոյանը: Նա Խորհրդային միության հերոս էր, ավիացիայի գեներալ-լեյտենանտ: Լուրը հայտնել է «ՄիԳ» օդանավաշինական ընկերությունը: Միկոյանն ընդհանուր առմամբ 102 տեսակի թռչող սարք է յուրացրել, այդ թվում՝ «ՄիԳ-23», «ՄիԳ-25» եւ «ՄիԳ-27» օդանավերը: Ստեփան Միկոյանը խորհրդային պետական գործիչ Անաստաս Միկոյանի որդին էր:

Երեւանում 90 տարեկանում մահացել է ականավոր պատմաբան, ակադեմիկոս Վլադիմիր Բարխուդարյանը: Նա բազմաթիվ գիտական աշխատությունների հեղինակ է, մի քանի տասնամյակ աշխատել է Գիտությունների ազգային ակադեմիայում: Հայաստանի անկախացումից հետո Բարխուդարյանը լուրջ ներդրում է ունեցել դպրոցական պատմության դասագրքերի ստեղծման գործում: Վլադիմիր Բարխուդարյանի քաղաքացիական հոգեհանգիստը տեղի կունենա մարտի 26-ին ժամը 12:00-ից 14:00-ը, ԳԱԱ նախագահության շենքում:

ԱՄՆ-ում էլ 67 տարեկանում վախճանվել է հայազգի հայտնի թմբկահար Ջոն «Սիբ» Հաշիանը: Նա ամերիկյան Boston խմբի երաժիշտներից էր: Հաշիանը մահացել է համերգային շրջագայության ժամանակ: Երաժիշտը մասնակցել է Boston-ի առաջին երկու ալբոմների ձայնագրությանը: Դա բավարար էր ռոքի պատմության մեջ մտնելու համար, քանի որ Հաշիանը հարվածային գործիքների պարտիան կատարել է մի քանի հայտնի հիթերում՝ «More Than a Feeling», «Long Time», «Peace of Mind»:

Եգիպտոսի նախկին նախագահ Հոսնի Մուբարաքը վերջապես դուրս է գրվել զինվորական հոսպիտալից: Նրա ազատ արձակման մասին տեղեկություններ տարածվեցին դեռեւս օրերս առաջ, սակայն Մուբարաքի փաստաբանն այն ժամանակ հերքեց այդ լուրերը: Հիմա պաշտպանը հաստատել է տեղեկությունը՝ հավելելով, որ վեց տարվա ընթացքում առաջին անգամ Մուբարաքը փողոց է դուրս եկել որպես ազատ մարդ: Հոսնի Մուբարաքին պաշտոնանկ արեցին 2011 թվականին: Նա տարածաշրջանի առաջին երկրի ղեկավարն էր, որին դատապարտեցին «արաբական գարունից» հետո:

Հայաստանի 2016 թվականի լավագույն ֆուտբոլիստներն ու մարզիչն այսօր պարգեւատրվել են: Տարվա լավագույն մարզիչ կոչմանն արժանացել էր «Շիրակը» գլխավորող Վարդան Բիչախչյանը, իսկ լավագույն ֆուտբոլիստների եռյակը գլխավորում է Հենրիխ Մխիթարյանը: Երկրորդ մրցանակին արժանացել է Գեւորգ Ղազարյանը, իսկ երրորդ լավագույն ֆուտբոլիստը Մարկոս Պիզելին է:

Մարտի 24-ին եվրոն թանկացել է, դոլարի արժեքը՝ նույնը մնացել: Արդյունքում դոլարի փոխարժեքն այսօր կազմել է 484 դրամ, եվրոյինը՝ 523, ռուբլունը՝ 8 դրամ 44 լումա, ֆունտինը՝ 604 դրամ:

Մարտի 25-ին հանրապետությունում սպասվում է առանց տեղումների եղանակ: Օդի ջերմաստիճանը մարտի 25-27-ն աստիճանաբար 3-4 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +1+3, ցերեկը՝ +14+16 աստիճան տաքություն: