Մեծ Բրիտանիան կմնա միակ երկիրը, որը ցանկացել է Եվրամիությունը լքել, համոզված է Գերմանիայի կանցլեր Անգելա Մերկելը:
«ԵՄ-ի առանձին երկրներ, իհարկե, մեր համատեղ ապագան կառուցելու վերաբերյալ տարբեր պատկերացումներ ունեն, բայց ընդհանուր առմամբ ուղին հստակ է՝ անհրաժեշտ է համագործակցությունը խորացնել ռազմական քաղաքականության մեջ, սահմանների պաշտպանության հարցերում, իսլամական ահաբեկչության դեմ պայքարում եւ այն ամենում, որոնք կամրապնդեն մեր տնտեսությունը եւ մեր երեխաների ու թոռների համար աշխատատեղեր կապահովեն»,- DW-ի փոխանցմամբ Passauer Neue Presse-ի հետ հարցազրույցում հայտարարել է Մերկելը:
Ակնկալվում է, որ մարտի 29-ին Մեծ Բրիտանիայի կառավարությունը Եվրամիության կազմից դուրս գալու պաշտոնական դիմում կներկայացնի: Անգելա Մերկելի խոսքով՝ այս իրադարձությունը չպետք է մթագնի Հռոմի համաձայնագրի ստորագրման 60-ամյակի տոնակատարությունը: «Մենք գիտեինք, որ նամակը, միեւնույն է, ստացվելու է՝ մեկ օր վաղ, մեկ օր ուշ: ԵՄ կազմի մեջ մտնող երկրները, որոնք ձգտում են համատեղ ապագայի, կարող են այդ տարեթիվը միասին տոնել»,- ընդգծել է Գերմանիայի կանցլերը: