Ապրիլին Հայաստանում մարզային ֆերմերային տոնավաճառների ծրագիր կկազմվի: NEWS.am-ի թղթակցի հետ զրույցում այս մասին հայտնեց Հայաստանի Փոքր եւ միջին բիզնեսի աջակցման ազգային կենտրոնի գործադիր տնօրեն Լեւոն Մնացականյանը՝ մեկնաբանելով ԵՄ դրամաշնորհային ծրագրի իրականացման ընթացքը:
1.1 մլն եվրո ծավալով ծրագիրը մեկնարկել է 2016 թվականի դեկտեմբերին եւ կտեւի 2 տարի: Նպատակն է աջակել Սյունիքի, Արարատի եւ Լոռու մարզերի փոքր բիզնեսին եւ ֆերմերներին: Դրա համար այնտեղ տոնավաճառներ կկազմակերպվեն՝ տեղական մրգերի եւ բանջարեղենի վաճառքն իրականացնելու համար:
«Այնտեղ ոչ միայն առեւտրի վայրեր կլինեն, այլեւ հանգստի եւ մշակութային փառատոնների համար համապատասխան հարթակներ: Ֆերմերներին աջակցությունը մեծացնելու համար մենք քննարկում ենք առեւտրի համար տարածքն անվճար տրամադրելու հնարավորությունը»,- նշեց Մնացականյանը: