Անհրաժեշտ է բոլոր ձայնագրությունները լսել եւ ուսումնասիրել: Մարտի 25-ին՝ լրագրողների հետ զրույցում այս մասին հայտարարեց Կենտրոնական ընտրական հանձնաժողովի նախագահ Տիգրան Մուկուչյանը՝ անդրադառնալով վերջերս տարածված դպրոցների եւ մանկապարտեզների տնօրենների մասնակցությամբ ձայնագրություններին, որոնք իշխանության օգտին ընտրողների հատուկ ցուցակներ են կազմել:
«Առաջին՝ մենք պարոն Իոաննիսյանին խնդրեցինք տրամադրել այդ բոլոր ձայնագրությունները: Անհրաժեշտ է այդ ամենը լսել եւ ուսումնասիրել: Յուրաքանչյուր ձայնագրությունը մեկ ինքնուրույն փաստ է: Մենք կլսենք եւ այդ կապակցությամբ մեր դիրքորոշման մասին կտեղեկացնենք»,- նշեց Տիգրան Մուկուչյանը:
Հիշեցնենք, որ Դանիել Իոաննիսյանի ղեկավարած «Իրազեկ քաղաքացիների միավորումը», որը ընտրությունների ժամանակ դիտորդական առաքելություն է իրականացնելու, գրանցել է իշխանության օգտին վարչական ռեսուրսի օգտագործման բազմաթիվ դեպքեր, մասնավորապես՝ ավելի քան 100 դպրոցների եւ մանկապարտեզների տնօրենները իշխանության օգտին ընտրողների հատուկ ցուցակներ են կազմել: