Մալթայի Հանրապետությունում ՀՀ արտակարգ եւ լիազոր դեսպան Վիկտորյա Բաղդասարյանը (նստավայրը՝ Հռոմ) մարտի 23-ին, իր հավատարմագրերն է հանձնել Մալթայի նախագահ Մարի Լուիզ Կոլեյրո-Պրեկային:
ԱԳՆ-ից NEWS.am-ին հայտնում են, որ հավատարմագրերի հանձնման արարողությանը հաջորդած առանձնազրույցի ընթացքում Մալթայի նախագահը խնդրեց իր ողջույնները փոխանցել ՀՀ Նախագահ Սերժ Սարգսյանին եւ անդրադարձ կատարեց երկու երկրների պատմական առնչություններին:
Դեսպան Բաղդասարյանն, իր հերթին Մալթայի Նախագահին փոխանցելով ՀՀ Նախագահի ողջույնները, հավաստիացրեց, որ իր գործունեության ընթացքում մեծ ջանքեր կներդնի հայ-մալթական երկկողմ հարաբերությունների խթանման եւ ամրապնդման ուղղությամբ:
Հանդիպման ընթացքում քննարկվեցին հայ-մալթական հարաբերությունների զարգացման հեռանկարներին վերաբերող հարցերի լայն շրջանակ:
Մալթա կատարած այցի ընթացքում դեսպան Բաղդասարյանը հանդիպումներ ունեցավ նաեւ Մալթայի արտաքին գործերի նախարար Ջորջ Վելայի եւ Մալթայի Ներկայացուցիչների պալատի նախագահ Անգլու Ֆարրուջայի հետ: