Մենք աջակցում ենք ու աջակցելու ենք կառավարության բոլոր այն ծրագրերին, ինչը կապահովի մեր երկրի բարգավաճումը: Այս մասին, այօսր՝ մարտի 25-ին, «Հայաստանի ներդրողների ակումբ» ոչ հրապարակային պայմանագրային ներդրումային ֆոնդի գործունեության պաշտոնական մեկնարկի արարողությունից հետո լրագրողների հետ զրույցում նշել է «Տաշիր» ընկերությունների խմբի նախագահ Սամվել Կարապետյանը:
Լրագրողի հիշեցմանը, որ ինքը խոստացել էր մարտին զարմացնել հասարակությանը ներդրումներով, Սամվել Կարապետյանն արձագանքեց. «Ինձ թվում է՝ արդեն զարմացնում ենք: Մենք եւ´ Մոսկվայում ենք ասել, եւ´ եկել ենք այստեղ ասելու, որ աջակցում ենք Հայաստանի կառավարությանը, աջակցելու ենք կառավարության բոլոր այն ծրագրերին, ինչը կապահովի մեր երկրի բարգավաճումը: Դրա համար ես կարող եմ ասել ինչպես «Տաշիր» խմբի, այնպես էլ մեր ընկերների անունից, ովքեր այսօր այստեղ են, մենք ամենաակտիվ մասնակցությունն ենք ունենալու այս ակումբի աշխատանքներում, ակումբի հաջողության գործում»:
Իր հերթին վարչապետ Կարեն Կարապետյանը նշեց, որ Ակումբի գործունեությունից ակնկալում է բիզնես միջավայրի փոփոխություն, նոր մշակույթի ձեւավորում, բիզնես էլիտայի մշակույթի փոփոխություն, կապիտալի եւ ֆինանսական շուկաներում ակտիվացում:
«Ակումբի անդամներն աշխարհով մեկ ունեն գործընկերներ, եւ ակնկալում եմ,որ իրենց մասնակցությունը կբերի նրան, որ այս ակումբը կդառնա կամուրջ բավական մեծ ֆինանսական շուկայի եւ բիզնես կառույցների միջեւ: Իրականում ես ակնկալում եմ, որ այն որակական փոփոխություն կմտցնի մեր բիզնես միջավայրում, բիզնես մթնոլորտում: Ավելին, ոչ թե ակնկալում եմ, այլ համոզված եմ, որովհետեւ սա առաջին օրինակն է, որտեղ պետությունը չի մասնակցում, լրիվ մասնավոր ակումբ է, որն ունի բիզնես նպատակներ, եւ հենց դա պետք է անենք: Այսօր մեր բոլոր գործընկերների հետ՝ թե´ Ռուսաստանի Դաշնությունում, թե´ այլ երկրներում բանակցում ենք, հենց այս դաշտ ենք ուզում տեղափոխել: Մենք դեմ չենք դրամաշնորհներին, բայց ուզում ենք միջավայր ստեղծել, որտեղ փող աշխատելը, շահույթ հետապնդելը, եկամուտ ստանալը Հայաստանում դառնա տրամաբանական, որովհետեւ դա փոխելու է տեխնոլոգիա, մտածելակերպ, ամեն ինչ»,-ասաց վարչապետը: