Սպասվող օրենսդրական նոր շտկումներից հետո ՌԴ տարածքում պետական գնումներին կկարողանան մասնակցել նաեւ ծրագրային ապահովումներ մշակող ընկերություններ ԵՏՄ անդամ մյուս պետություններից: Այս մասին, մարտի 24-ին, Երեւանում ԵՏՄ անդամ պետությունների կապի եւ հեռահաղորդակցության ոլորտի գերատեսչությունների ղեկավարների խորհրդակցական նիստի ժամանակ նշել է ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
Նախարարությունից NEWS.am-ին հայտնում են, որ հանդիպման նպատակը տեղեկատվական - հեռահաղորդակցական տեխնոլոգիաների կիրառմանն ու տեղեկատվայնացմանն առնչվող հարցերի քննարկումն էր: Որոշվեց ստեղծել լիազորված մարմին, որը կունենա պարբերական հանդիպումներ ու կքննարկի ԵՏՄ անդամ - պետություններում թվայնացման գործընթացներին առնչվող հարցեր:
Նիստի շրջանակներում առաջին անգամ նախարարների մակարդակով քննարկվեցին այս ոլորտին առնչվող արդիական խնդիրներ:
«Շնորհակալ եմ գործընկերներիս արդյունավետ խորհրդակցության համար: Մի շարք կարեւոր որոշումներ ընդունեցինք այսօր»,- նշեց ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
Քննարկվեց այն հարցը, թե ինչ ձեւաչափով է շարունակվելու լիազոր մարմնի աշխատանքը:
«Եկանք եզրակացության, որ անհրաժեշտ է ձեւավորել աշխատանքային ձեւաչափ եւ, ամենայն հավանականությամբ, մյուս խորհրդակցությանը մենք կներկայացնենք առաջարկություններ, թե ինչպես կարելի է առաջ շարժվել: Կարեւորը համաձայնության եկանք, որ անհրաժեշտ է պարբերաբար հանդիպել, մտքեր փոխանակել եւ վեր հանել այն հարցերը, որոնք վերաբերում են տեղեկատվական - հեռահաղորդակցական տեխնոլոգիաներին եւ ԵԱՏՄ տարածքում թվային օրակարգի ձեւավորմանը»,- ասաց ԵԱՏՀ Կոլեգիայի (նախարար) անդամ Կարինե Մինասյանը:
ՌԴ կապի եւ զանգվածային հաղորդակցության նախարար Նիկոլայ Նիկիֆորովն ընդգծեց, որ ամբողջ աշխարհում անընդհատ աճում է ինտերնետ օգտագործողների թիվը, մեծանում է էլեկտրոնային առեւտրի մասնաբաժինը, ավելի ու ավելի շատ ապրանքներ գնվում եւ վաճառվում են համացանցի միջոցով, էլեկտրոնային են դառնում շատ գործընթացներ:
«Մեր խմբի խնդիրն է՝ այդ գործընթացները կարգավորել նաեւ միջպետական մակարդակով, որպեսզի հնարավոր լինի գործնական շփումներ իրականացնել ԵՏՄ անդամ - պետությունների միջեւ, վաճառել ապրանքներ եւ ծառայություններ, ընդ որում` դրանք իրականացնելով էլեկտրոնային եղանակով»,- նշեց Նիկոլայ Նիկիֆորովը:
ՌԴ կապի եւ զանգվածային հաղորդակցության նախարարի խոսքով` ոլորտը կարգավորող ռուսաստանյան օրենսդրության մեջ 2014 թվականին կատարվեցին փոփոխություններ, որոնք ՌԴ-ում պետական գնումների մասնակցության հարցում լրացուցիչ առավելություն էին տալիս ծրագրային ապահովումներ մշակող ռուսական ընկերություններին: Քննարկվել է այդ սահմանափակումը վերացնելու հարցը:
Նախարար Վահան Մարտիրոսյանը ընդգծեց, որ սպասվող օրենսդրական նոր շտկումներից հետո ՌԴ տարածքում պետական գնումներին կկարողանան մասնակցել նաեւ ծրագրային ապահովումներ մշակող ընկերություններ ԵՏՄ անդամ մյուս պետություններից:
«Դա հնարավորություն կտա ԵՏՄ անդամ պետությունների ՏՏ ընկերություններին մուտք ունենալ 2 միլիարդ ռուբլիանոց շուկա»,- նշեց Նիկոլայ Նիկիֆորովը:
Նախարարների հաջորդ խորհրդակցությունը պլանավորվում է անցկացնել ապրիլին Մինսկում:
Թվայնացման օրակարգի քննարկում է նախատեսվում նաեւ մայիսի վերջին ԵՏՄ կառավարությունների ղեկավարների հանդիպման շրջանակներում:
