Անհրաժեշտ է Հայաստանի Հանրապետական կուսակցությանը զրկել առաջիկա ընտրություններին մասնակցելու հնարավորությունից: Մարտի 25-ին՝ Մեծամորում նախընտրական քարոզարշավի ընթացքում լրագրողներին ասաց «Օհանյան-Րաֆֆի-Օսկանյան» դաշինքի անդամ, «Ժառանգություն» կուսակցության առաջնորդ Րաֆֆի Հովհաննիսյանը:
«Ապացույցներ կան, որ նրանք չարաշահել են վարչական ռեսուսները եւ նախընտրական գործընթացը օրենքի շրջանակներից դուրս են բերել»,- ասաց նա՝ հավելելով, որ տնօրեններն իրենք են խոստովանել, որ ցուցակներ են կազմել, մարդկանց են վախեցրել՝ ստիպելով քվեարկել իշխող կուսակցության օգտին:
«Սա օրենքի կոպիտ խախտում է: Եթե նման բան տեղի ունենար արեւմտյան ցանկացած երկրում, արդեն քրեական գործեր հարուցված կլինեին: Ավելին՝ իրեն կուսակցությանն էլ պատասխանատվության կենթարկեին՝ զրկելով ընտրություններին մասնակցելու հնարավորությունից: Ի վերջո, ընտրությունների օրինականությունը չի որոշվում միայն այն հանգամանքով, թե դրանք ինչպես են անցնում անմիջապես քվեարկության օրը, այլ նաեւ նախընտրական գործընթացներով»,- ընդգծեց Հովհաննիսյանը:
Քաղաքական գործիչը նաեւ նշեց, որ ՀՀԿ-ն իր նախընտրական արշավը սկսել է ամսաթիվը նշանակելուց շատ ավելի վաղ: Ավելին՝ նրանց ներկայացուցիչները բռնություն են կիրառել եւ քաղաքական պատկերացումներով կալանավորումներ են կատարել:
Ինչ վերաբերում է այն հարցին՝ անհրաժե՞շտ է պատասխանատվության ենթարկել դպրոցների եւ մանկապարտեզների տնօրեններին, Հովհաննիսյանը նշեց, որ դա պետք է դատարանը որոշի, սակայն փաստ է, որ այս մարդիկ իսկապես օրենքը խախտել են: