Խորհրդարանական ընտրություններին մասնակցող 9 քաղաքական ուժերից միայն «Ազատ դեմոկրատներն» են, որ նոր քաղաքական օրակարգ են առաջարկում: Այսօր՝ մարտի 25-ին Կոտայքի մարզի Աբովյան քաղաքում ընտրողների հետ հանդիպման ժամանակ այս մասին հայտարարել է «Ազատ դեմոկրատներ» կուսակցության ղեկավար Խաչատուր Քոքոբելյանը:
«Մենք ասում ենք, որ հյուսիսից տաք քամի չի գալիս: Մինչեւ հիմա բռնելով հյուսիսի ճանապարհը, անդամակցելով ԵՏՄ-ին՝ մեզ հավաստիացնում էին, որ Հայաստանում առնվազն անվտանգության բաղադրիչը կուժեղանա: Բայց մենք բոլորս տեսանք, թե ինչ եղավ քառօրա պատերազմի ժամանակ: Մենք ականատես եղանք, որ նույնիսկ այդ օրերին Ռուսաստանի բարձրաստիճան պաշտոնյաների մակարդակով հայտարարում էին, որ շարունակելու են Ադրբեջանին զենք վաճառել»,- հայտարարեց Քոքոբելյանը:
«Ազատ դեմոկրատների» ընտրարշավը Քոքոբելյանը որակեց հպարտության, ինքնասիրության արշավ՝ հավելելով, որ այսօր Հայաստանի քաղաքացու ինքնասիրության խնդիր կա: Ուրախ էր՝ լեցուն դահլիճ տեսնելով. դա հույս է տալիս, որ միայն ընտրակաշառքով չէ, որ մարդիկ հավաքվում են, որ «միայն ընտրակաշառքը չէ, որ Հայաստանում եղանակ է փոխում»:
«Վստահ եմ՝ մենք ապացուցելու ենք, որ Հայաստանի քաղաքացին իր ինքնասիրությունը չի վաճառում»,- հավելեց Խաչատուր Քոքոբելյանը: