Հայաստանի Կենտրոնական ընտրական հանձնաժողովը (ԿԸՀ) մարտի 25-ի արտահերթ նիստում մերժեց «Ելք» դաշինքից պատգամավորության թեկնածուների՝ փաստաբան Նիկոլայ Բաղդասարյանի եւ իրավապաշտպան Արտակ Զեյնալյանի դիմումը՝ ՀՀԿ-ից պատգամավորության թեկնածու Առաքել Մովսիսյանի գրանցումն ուժը կորցրած ճանաչելու մասին:
Ներկայացնելով համապատասխան որոշումը՝ ԿԸՀ նախագահ Տիգրան Մուկուչյանը նշեց, որ վերոնշյալ հայտարարությունում նշվում է բացառապես խախտման բնույթի մասին: «Եվ որեւէ ապացույց կամ հիմնավորում, որ դա կազդի ընտրությունների ելքի վրա, ըստ էության, չի ներկայացվել»,- ընդգծեց Տիգրան Մուկուչյանը:
Իրավապաշտպան Արտալ Զեյնալյանն արձագանքեց. «Խախտման հետեւանքներն անհնար է փոխել, խոստումներն անհնար է վերացնել: Եթե անհնար է վերացնել խախտման հետեւանքները, նշանակում է՝ հարկավոր է դատարան դիմել: Այստեղ միայն մեկ իրավական հետեւանք կա. հայցով դատարան դիմել»:
Փաստաբան Նիկոլայ Բաղդասարյանը, իր հերթին, հիշեցրեց, որ համապատասխան ապացույցներ է ներկայացրել լուսանկարների եւ տեսանյութի տեսքով:
Հիշեցնենք, որ «Ելք» դաշինքից պատգամավորության թեկնածուները ԿԸՀ դիմում էին ներկայացրել՝ պահանջելով ուժը կորցրած ճանաչել ՀՀԿ-ից պատգամավորության թեկնածու Առաքել Մովսիսյանի գրանցումը: Դիմումում, մասնավորապես, ներկայացվել են հենց Մովսիսյանի կողմից հրապարակված փաստերն այն մասին, որ նա Արմավիրի մարզի Ծաղկալանջ համայնքում խոստացել է ասֆալտապատել կենտրոնական փողոցը՝ ընտրություններում իր օգտին քվեարկելու դիմաց: