Երբ մենք հանձնեցինք հանրապետությունը, այդ ժամանակ բնակչության թիվը հասնում էր 4 միլիոնի: Այս մասին այսօր` մարտի 25-ին, Արագածոտնի մարզում, նախընտրական քարոզարշավի ժամանակ հայտարարել է Հայաստանի կոմունիստական կուսակցության ցուցակի առաջին հորիզոնականը զբաղեցնող Տաճատ Սարգսյանը:
Նրա խոսքով` Հայաստանում մարդ չէր մնացել, երբ հանրապետությունը մտավ ԽՍՀՄ-ի կազմի մեջ. «Ժողովուրդը հայտնվել է խայտառակ ծայրաստիճան վիճակում, բայց ձեր վիճակը համեմատաբար լավ է: Մենք հանրապետության արդեն մի ծայրից մտել ենք, մյուսից` դուրս եկել: Հանդիպում ենք մարդկանց, որոնք ոչ ուզում են խոսել, ոչ մտածում են, մտքերի հետ են, մտամոլոր: Երբ մենք եկանք իշխանության, այդ ժամանակ հանրապետությունը ընդամենը 600-700 հազար բնակչություն ուներ: Երբ որ մենք հանձնեցինք հանրապետությունը, այդ ժամանակ բնակչության թիվը հասավ 4 միլիոնի»,-ասաց նա:
Կոմունիստական կուսակցության առաջնորդը խոսեց նաեւ արտագաղթի մասին, որը ըստ նրա լրջագույն խնդիրներից մեկն է. «Այսօր շատ ընտանիքների կամ հայրն է բացակայում, կամ կողքի ընտանիքի մայրը, կամ կինն է մնացել առանց ամուսին, կամ ամուսինն է մնացել առանց կին»:
Կոմունիստները հորդորեցին ընտրողներին չվախենալ եւ քվեարկել կոմկուսի օգտին.«Եղեք համարձակ եւ սկզբունքային: Ինչ ձեզ առաջարկում են, ձեզնից գողացած գումարներն են, մի վերցրեք ու արհամարեք: Վերադարձրեք այն կուսակցությունը, որի օրոք դուք ապրել եք ըստ պահանջի; Մի վախեցեք, քվեարկեք կոմկուսի օգտին»: