Քուչակ գյուղի «Ծառուկյան» դաշինքի շտաբի դանակահարված պետի վիճակը բավարար է, բայց նրան Վերակենդանացման բաժանմունքից հիվանդասենյակ տեղափոխել դեռ չի նախատեսվում: Այսօր՝ մարտի 26-ին, NEWS.am-ի հետ զրույցում «Աստղիկ» բժշկական կենտրոնի գլխավոր բժիշկ Ռոբերտ Կուրղինյանը նշեց, որ Արամ Ասատրյանի վնասվածքն այնպիսին է, որ նրա մոտ վիճակի պարբերաբար փոփոխություն է լինում՝ ջերմություննն է բարձրանում եւ նրան այս վիճակում հիվանդասենյակ տեղափոխել դեռ չի կարելի:
Նշենք, որ Արամ Ասատրյանը «Աստղիկ» բժշկական կենտրոն էր տեղափոխվել մարտի 20-ին՝ գոտկային շրջանում ծակած վերքով:
Ավելի վաղ ոստիկանությունից NEWS.am-ին հայտնել էին, որ մարտի 19-ին, ժամը 23:30-ին, «Ապարանի» բժշկական կենտրոնից ահազանգ է ստացվել, որ կտրած-ծակած վերքերով իրենց մոտ են տեղափոխվել Արամ Ասատրյանն ու Մանուկ Հովսեփյանը:
Նրանք վիճաբանության ժամանակ անհայտ անձի կողմից ստացել են կտրած-ծակած վերքեր: Ձեռնարկվում են անհրաժեշտ միջոցառումներ կասկածյալին հայտնաբերելու ուղղությամբ, նշանակվել է դատաբժշկական փորձաքննություն, կատարվում է քննություն: