Ազատության հրապարակից մեկնարկել է «Երթ հանուն ազատ և արդար ընտրությունների» ակցիան դեպի Կենտրոնական ընտրական հանձնաժողով՝ իշխող հանրապետական կուսակցության գրանցումը չեղարկելու պահանջով:
NEWS.am-ի թղթակիցը հաղորդում է, որ Ազատության հրապարակում փոքր խումբ մարդիկ էին հավաքվել՝ պաստառներով, որոնց վրա ՀՀԿ-ի համար ցուցակներ հավքագրող դպրոցների եւ մանկապարտեզների տնօրենների նկարներն էին:
«Պետք է միանշանակ ողջունել մեկ ՀԿ-ի կողմից կատարված ուսումնասիրությունը: Ըստ էության առաջին անգամ լրջորեն եւ հիմնավոր փաստել է ՀՀԿ-ի կողմից ընտրական օրենսգրքի մի շարք նորմերի կոպիտ խախտումը, վարչական ռեսուրսների չարաշահումը»,- հայտարարել է իրավապաշտպան Արթուր Սաքունցը եւ հավելել. «Այն որ Սերժ Սարգսյանը հայտարարել էր ազատ եւ անկախ ընտրություններ անցկացնելու պատրաստակամության մասին, ի չիք է դարձել մեկ անձի շնորհիվ»:
Ըստ Սաքունցի, գործ ունենք մի այնպիսի իրավիճակի հետ, երբ համակարգված, շարունակական խախտումներ կան իշխող կուսակցության կողմից: «Արդյոք տեղին է նման պայմաններում մասնակցել մի ընտրական պրոցեսի, որն արդեն իսկա զատ եւ արդար համարել չենք կարող»,- ասել է նա՝ դիմելով ընտրություններին առաջադրված մյուս կուսակցություններին եւ դաշինքներին: Ըստ Սաքունցի, պետք է, որ այդ ուժերը միասնական կարողանան գաղափարական տարաձայնությունները մի կողմ դնեն եւ դիմում ներկայացնեն ԿԸՀ՝ ՀՀԿի կողմից վարչական ռեսուրսի չարաշահման վերաբերյալ, որ ԿԸՀ-ն ՀՀԿ-ի գրանցումը չեղարկելու պահանջով դիմի դատարան:
Ակցիային մասնակցումէ նաեւ «Ժառանգություն» կուսակցության փոխնախագահ, ՕՐՕ դաշինքի երկրորդ համարը զբաղեցնող Արմեն Մարտիրոսյանը:
Նշենք, որ «Իրազեկ քաղաքացիների միավորումը» հրապարակել է հանրապետության բոլոր մարզերը եւ Երեւանի բոլոր տարածքները ընդգրկող թվով 84 դպրոցի եւ 30 մանկապարտեզի տնօրենների հետ զրույցների մանրամասներ, թե ինչպես են ցուցակներ հավաքագրում ՀՀԿ-ի համար: