Գյումրին բոլոր շանսերը ունի ավելի զարգանալու համար: Այս մասին այսօր՝ մարտի 26-ին, Գյումրիում ընտրողների հետ հանդիպմանն ասել է ՀՀ արդարադատության նախարար Արփինե Հովհաննիսյանը: Նա իր ելույթի ժամանակ պատմել է «Պոլոզ Մուկուչի» հայտնի անեկդոտը եւ ասել, որ Գյումրին բոլոր շանսերը ունի աշխարհի կենտրոն դառնալու համար:
«Երբ Պոլոզ Մուկուչին հարցնում են՝ աշխարհի կենտրոնը ո՞րն է, պատասխանում է՝ Գյումրին է, ուղղակի շատ պետություններ չտեսնելու կուտան: Ես հավատում եմ, որ այս քաղաքը բոլոր շանսերը ունի դառնալու աշխարհի կենտրոնը»,-ասել է նա:
Նա գյումրեցիներին կոչ է արել ապրիլի 2-ի խորհրդարանական ընտրություններին գնալ շիրակցուն բնորոշ թասիբով եւ կատարել ճիշտ ընտրություն՝ չմոռանալով գալիք օրվա մասին:
Նշենք, որ հանրապետական կուսակցության նախընտրական քարոզարաշվը Շիրակի Մարզում շարունակվում է: Հանրապետական կուսակցության նախագահի առաջին տեղակալ Կարեն Կարապետյանին ուղեկցում են Շիրակի տարածքային ցուցակով առաջադրված Արման Սահակյանը, Ֆելիքս Ցոլակյանը, Սուքիաս Ավետիսյանը, Մարտուն Գրիգորյանը եւ Սամվել Նիկոյանը: