Նորք Նորքում՝ Գայի արձանի մոտ հանրապետական թեկնածու Միհրան Պողոսյանի քարոզարշավն ու կազմակերպած համերգը պայմանավորված ժամանակից ուշ է ավարտվել, «Օհանյան-Րաֆֆի-Օսկանյան» դաշինքի ներկայացուցիչները կարծում են, թե այդկերպ փորձում են խոչընդոտել իրենց նախանշված հանրահավաքը:
NEWS.am-ի թղթակիցը հայտնում է, որ պայմանավորվածություն կար ի սկզբանե, որ ժամը 18-ին Պողոսյանի հանրահավաքը պետք է ավարտվեր, եւ սկսվեր ՕՐՕ դաշինքի հանդիպումը: Բարձրախոսները, սակայն, պայմանավորված ժամին չեն հանել, եւ դաշինքի ներկայացուցիչները սպասում են տարածքում, որ կարողանան սկսել իրենց հավաքը։
Մեր թղթակցի փոխանցմամբ, Գայի արձանի մոտ են Սեյրան Օհանյանը, Րաֆֆի Հովհաննիսյանը, Վարդան Օսկանյանը:
«Ժառանգություն» կուսակցության փոխնախագահ Արմեն Մարտիրոսյանը NEWS.am-ի թղթակցի հետ զրույցում հայտարարել է, թե հավանաբար դիտմամբ են արել: «Ողջ համակարգը հանրապետականի համար է աշխատում՝ դպրոցները, մանկապարտեզները, համայնքապետարանները, մարզպետարանները, իսկ ոստիկանությունը եւ ԱԱԾ-ն դա չտեսնելու են տալիս: Զարմանալի չէ, որ այսկերպ էլ շարունակում են: Սա հանրապետականն է եւ վերջ»: