Չի կարելի, որ զարգանա միայն Երեւանի կենտրոնը ու բոլոր կարեւոր բաները միայն այնտեղ կենտրոնացած լինեն՝ անհրաժեշտ է ապահովել ամբողջ մայրաքաղաքի համաչափ զարգացումը, որպեսզի քաղաքի ծայրամասերը ոչնչով չզիջեն կենտրոնին։ Այս մասին մարտի 26-ին Երեւանի Նոր Նորք վարչական շրջանում ընտրողների հետ հանդիպման ժամանակ ասել է «Ժառանգություն» կուսակցության նախագահ Րաֆֆի Հովհաննիսյանը։
Նրա խոսքով, ամբողջ մայրաքաղաքը պետք է համաչափ զարգանա, իսկ բոլոր մարդիկ՝ անկախ նրանից ապրում են փոքր բնակարաններում թե մեծ առանձնատներում, պետք է հավասարաչափ պաշտպանված լինեն օրենքով։
«Ոչ մեկի կինը, ոչ մեկի փեսան կամ ազգականրը չպետք է հնարավորություն ունենան հարստանալ իրենց պաշտոնի շնորհիվ։ Հակառակը, ժողովուրդը պետք է հարստանա, գյուղն ու փոքր բիզնեսը պետք է ստանան ապագան ու հնարավորությունները, իսկ արտագաղթի խնդիրը պետք է անցյալում թողնել»,- ասել է Րաֆֆի Հովհաննիսյանը։
Նրա խոսքով, այսօր Հայաստանի քաղաքացիների իրավունքները ոչ միայն պաշտպանված չեն, այլ նրանց՝ մասնավորապես դպրոցների ու մանկապարտեզների տնօրեններին դարձնում են հանցակիցներ։ Թեկնածուն հիշեցրել է, որ ՕՐՕ դաշինքը պահանջում է ՀՀԿ-ին զրկել գալիք ընտրություններին մասնակցելու հնարավորությունից՝ Րաֆֆի Հովհաննիսյանի կարծիքով այսօրվա դրությամբ առկա փաստերը միանգամայն բավարար են դրա համար։
Հիշեցնենք, որ «Իրազեկ քաղաքացիների միավորում» ՀԿ-ն արձանագրել է վարչական ռեսուրսը հօգուտ ՀՀԿ-ի օգտագործելու բազմաթիվ դեպքեր, մասնավորապես ավելի քան 100 դպրոցների ու մանկապարտեզների տնօրենները կազմել են ընտրողների հատուկ ցուցակներ՝ հօգուտ Հայաստանի իշխանությունների։