Լոռեցի մի խումբ երիտասարդներ Վանաձորում նախաձեռնել եւ իրականացնում են «Խոսուն պատեր» նախագիծը, որի շրջանակներում Վանաձորի շենքերի պատերին հայտնվում են լոռեցի գրողների, ճարտարապետների ու մշակութային գործիչների դիմանկարները: Երիտասարդների ջանքերով պատերին նկարվել են նաեւ ՏԻՄ օրենքի այնպիսի կետեր, որոնք օգտակար են բոլորին:

Մարտի 26-ին Ճարտարապետության և շինարարության Հայաստանի ազգային համալսարանի ուսանողական խորհուրդը եւ մի խումբ ուսանողներ միացել են «Խոսուն Պատեր» նախագծին:

Նախագծի ղեկավար Թաթուլ Ղազարյանը NEWS.am-ի հետ զրույցում խոսելով նախագծի մասին, նշեց, որ ծրագիրն իր մեջ ներառում է երկու ճյուղ՝ իրավական եւ կրթամշակութային. «Իրավականն իր մեջ ներառում է կոչ-գրություններ ՏԻՄ օրենքի վերաբերյալ, իսկ կրթամշակութայինը՝ հայտնի լոռեցիների դիմանկարներ»:

«Մենք» Լոռու մարզի երիտասարդական ՀԿ-ի ղեկավար Վահե ԽԱչիկյանի խոսքով՝ բնակիչները դրական են արձագանքել իրականացվող նախագծին, թեեւ եղել են նաեւ մարդիկ, որոնք այս ամենը կապել են ընտրական պրոցեսների հետ:

Վանաձորի քաղաքապետարանի քաղաքաշինության եւ Ճարտարապետության բաժնի պետ Սուրեն Աբովյանի խոսքով՝ երբ երիտասարդները ներկայացրել են ծրագիրը, քաղաքապետարանը անմիջապես դրական է արձագանքել: Քաղաքի գլխավոր ճարտարապետը հույս է հայտնում, որ նախագիծը շարունակական կլինի:

Նշենք, որ նախաձեռնությունը հնարավոր է դարձել «ՀԿ Կենտրոն» ՔՀԶ ՀԿ-ի կողմից իրականացվող «ՀաՄաՏեղ» ծրագրի շրջանակներում՝ Ամերիկայի ժողովրդի աջակցությամբ` ԱՄՆ Միջազգային զարգացման գործակալության միջոցով: Նախագծին ֆինանսական աջակցություն են ցուցաբերել նաեւ Վանաձոր համայնքի ավագանու «Լուսավոր Հայաստան» ու «Հանրապետական» խմբակցությունները եւ քաղաքապետարանի գլխավոր ճարտարապետ պարոն Աբովյանը: Ծրագրի իրականացմանն աջակցում է «Մենք» Լոռու մարզի երիտասարդական ՀԿ-ի ջանքերով:

Լուսանկարներն ու տեսանյութը՝ Էդվարդ Արզումանյանի