Ոստիկանության, ԱԱԾ-ի ու բանակի ծառայողների շատ մեծ թիվ «Ելք» դաշինքի օգտին է քվեարկելու: Այս մասին, այսօր՝ մարտի 27-ին, Մասիսում ընտրողների հետ հանդիպման ժամանակ նշել է «Ելք» դաշինքի ցուցակի 3-րդ հորիզոնականը զբաղեցող, ԱԺ պատգամավոր Նիկոլ Փաշինյանը:
«Մարաթոնյան վազը գիտեք չէ, 42 կմ է: Ասենք վազում, վազում ենք, հասել ենք 30-րդ կմ-ին: Ու կողքից ասում են. «Ախպեր, որ էդքան վազում ես, ի՞նչ ա եղել, վազում, վազում ես, հլա տեղ չես հասել»: Հա, տեղ չենք հասել, որովհետեւ դեռ 12 կմ կա: Հիմա եթե այդ վազքի մեջ մի բաժակ ջուր մեզ տալիս եք, երկու հատ ծափ եք տալիս, մի հատ էլ ձայն եք տալիս, մարդու էներգիան բարձրանում է, մարդը հասկանում է, որ աջակիցներ ունի: Ֆուտբոլում ասում են՝ հանդիսատեսը 12-րդ խաղացողն է: հիմա դուք դառնո՞ւմ եք 12-րդ խաղացողը, թե չէ»:
Մասիսցիներից մեկի դիտարկմանը, թե ամեն ինչ ճիշտ եք ասում, բայց ՀՀԿ-ի ռեսուրսը մեծ է՝ բանակ, ոստիկանություն, Փաշինյանն արձագանքեց. «Մի քիչ սիրուն էլ չի լինում ասել, բայց ռեժիմը խուճապի մեջ է: Ես համոզված եմ, որ ոստիկանության, ԱԱԾ-ի ու բանակի ծառայողների շատ մեծ թիվ մեր օգտին է քվեարկելու: Ես դրանում համոզված եմ»: