Մարտի 25-ին, ժամը 21.05-ին, հիվանդանոցից ոստիկանության Տարոնի բաժնում հաղորդում է ստացվել, որ «աջ սրունքի վերին երրորդականի քերծվածք, ձախ ոտնաթաթի քերծվածք» ախտորոշմամբ բուժօգնության է դիմել 30-ամյա տղամարդ եւ հայտնել, որ վնասվածքը ստացել է Վանաձորի Տիգրան Մեծ պողոտայում` Վանաձորի պետական մանկավարժական համալսարանի դիմաց, վրաերթի հետեւանքով:
Մեկնած օպերատիվ խմբին տղամարդը հաղորդում է տվել, որ նույն օրը, ժամը 18.00-ի սահմաններում, Տիգրան Մեծի պողոտայի թիվ 36 հասցեի դիմաց ճանապարհի երթեւեկելի գոտում իրեն անհայտ ավտոմեքենան վրաերթի է ենթարկել, որից հետո անծանոթ երիտասարդներ իրեն տեղափոխել են հիվանդանոց:
Նույն օրը, ժամը 21.30-ին, 34-ամյա մի տղամարդ կամավոր ներկայացել է բաժին եւ հայտնել, որ վրաերթը կատարել է ինքը իր վարած «Մերսեդես» մակնիշի ավտոմեքենայով, որից հետո վախենալով մոտենալ տուժողին, նրա հետեւից գնացել է հիվանդանոց, տեղեկանալով վիճակի բարվոք լինելու մասին եւ ներկայացել է բաժին:
Կատարվում է քննություն: