Մոսկվայի Տվերի շրջանային դատարանը ընդդիմադիր Ալեքսեյ Նավալնուն տուգանել է 20 հազար ռուբլով, հայտնում է «Դոժդը»:
Նավալնուն մեղավոր են ճանաչել Մոսկվայում չարտոնված զանգվածային ակցիա կազմակերպելու համար: Դատարանը քաղաքական գործչին մեղավոր է ճանաչել Վարչական իրավախախտումների օրենսգրքի 20.2.2 հոդվածի 1-ին մասով (հրապարակային միջոցառում չհամարվող զանգվածային միաժամանակյա ներկայության եւ (կամ) հասարակական վայրերում քաղաքացիների տեղափոխության կազմակերպումը, նման գործողությունների հրապարակային կոչերը, նաեւ դրանց մասնակցությունը, եթե դրանք առաջացրել են հասարակական կարգի խախտում):
Տվերի դատարանը Նավալնու դեմ երկու մեղադրանք է քննում: Նրան առաջադրվել է նաեւ ոստիկանության աշխատողի օրինական պահանջին չենթարկվելու մեղադրանք: Դատական նիստի ժամանակ Նավալնին խնդրել է դատարան կանչել երկրի վարչապետ Դմիտրի Մեդվեդեւին: «Ես ցանկանում եմ դատարան կանչել երեկվա հանրահավաքի իրական կազմակերպչին: Նա կարող է բացատրել, թե երեկ ինչու էր այդքան թվով մարդ փողոց դուրս եկել»,- նշել է Նավալնին:
Նրա փաստաբան Օլգա Միխայլովան բացահայտել է ոստիկանության կողմից Նավալնու ձերբակալության արձանագրության վերաշարադրումը: Ոստիկանները հասկանում էին, որ Նավալնուն ապօրինի են ձերբակալում, այդ պատճառով արձանագրությունը կեղծել են, պնդել է քաղաքական գործչի պաշտպանը: Նախնական արձանագրության մեջ միջոցառումը հրապարակային է համարվել, բայց հիմա նրան տարերային երթի կազմակերպման մեղադրանք վերագրվում, որի համար վարչական կալանք է նախատեսված, պարզաբանել է փաստաբանը:
Մարտի 26-ին Մոսկվայում կոռուպցիայի դեմ չարտոնված բողոքի ակցիա է անցկացվել: Ոստիկանության տվյալներով՝ ակցիային մասնակցել է մոտ 7-8 հազար մարդ: Ձերբակալվածների թիվը 1000 մարդուց անցնում է: Նավալնիին ձերբակալել են ակցիան սկսվելուց 20 րոպե հետո՝ մետրոյի «Մայակովսկի» կայարանի մոտ: