«Ծառուկյան» դաշինքի ներկայացուցիչ, ԱԺ ԲՀԿ խմբակցության պատգամավոր Նաիրա Զոհրաբյանն այսօր՝ մարտի 27-ին, գառնեցիների հետ հանդիպման ժամանակ կոչ է արել երեխաներին հանել այն դպրոցներից, որոնց տնօրենները Հայաստանի հանրապետական կուսակցության համար ձայներ են հավաքել:
«Հիմա ո՞նց ենք մենք մեր երեխաներին վստահում այդ տնօրեններին, այդ կրիմինալ հանցագործներին, որովհետեւ ինձ համար տարբերություն չկա՝ ընտրակեղծարարը բարձրագույն կրթություն ստացած դպրոցի տնօրե՞ն է, թե՞ թաղի խուժան կրիմինալ, ես այդ երկուսի մեջ հավասարության նշան եմ դնում եւ կոչ եմ անում՝ հանել ձեր երեխաներին դպրոցներից, ովքեր այդ կրիմինալների դպրոցներում են սովորում, որովհետեւ մենք մեր երեխաներին չենք տվել, որպեսզի նրանց ծնողների վրա բռնություն գործադրեն: Համոզված եմ, որ այդ տնօրեններին էլ են պարտադրել լինել հանցագործ, կրիմինալ, ասել են՝ եթե չբերեք այդ ցուցակները, կհանենք պաշտոնից, որովհետեւ պաշտոնն իրենք համարում են նվեր»,-ասել է նա:
Նշենք, որ «Իրազեկ քաղաքացիների միավորումը» հրապարակել է հանրապետության բոլոր մարզերը եւ Երեւանի բոլոր տարածքները ընդգրկող թվով 84 դպրոցի եւ 30 մանկապարտեզի տնօրենների հետ զրույցների մանրամասներ, թե ինչպես են ցուցակներ հավաքագրում ՀՀԿ-ի համար: