Համակարգում անփոխարինելի մարդիկ չեն լինում։ Այս մասին մարտի 27-ին լրագրողների հետ հանդիպման ժամանակ հայտարարել է ՀՀ պաշտպանության փոխնախարար, «Օհանյան-Րաֆֆի-Օսկանյան» դաշինքի առաջնորդներից Սեյրան Օհանյանը՝ խոսելով Հայաստանի նախագահ Սերժ Սարգսյանի վերջին հայտարարությունների մասին Արցախում եւ այն հարցի մասին, թե արդյոք միայն նա կարող է լուծել Արցախի խնդիրն ու ապահովել Հայաստանի անվտանգությունը։
«Քանի որ Սահմանադրության՝ մեզ հատկացրած հնարավորությունների շրջանակներում մենք գնում ենք դեպի նոր իշխանության ձեւավորում, ըստ էության ապացուցում ենք, որ իշխանության փոփոխություն է անհրաժեշտ։ Իշխանություններին տարիներ շարունակ թվացել է, որ միայն իրենք են ճիշտ», - նշել է Օհանյանը։
Նրա խոսքով՝ այսօր իշխանության ցանկացած ուժ կարող է լուծել Հայաստանի անվտանգության ապահովման խնդիրը։ «Դա այն բանի արդյունքն է, որ հայկական բանակը կայացած կառույց է, ու ես հպարտանում եմ դրանով։ Ոչ ոք չի կարող ասել, թե զրոյից է ստեղծել հայկական բանակը՝ ինչպես ասվում է ժամանակ առ ժամանակ։ Յուրաքանչյուրս մեր դերն ունենք այդ գործում», - հավելել է Սեյրան Օհանյանը։