Չինաստանի սննդամթերքի անվտանգության ոլորտում լիազոր մարմնի պատվիրակությունը Հայաստանում քննարկել է մեղրի արտահանման հնարավորությունը:
ՀՀ ԳՆ սննդամթերքի անվտանգության պետական ծառայությունից NEWS.am-ին հայտնում են, որ Ծառայության պետ Իշխան Կարապետյանն ընդունել է Հայաստանում գտնվող՝ Չինաստանի Ժողովրդական Հանրապետության որակի վերահսկողության, զննության եւ կարանտինի գլխավոր ադմինիստրացիայի պատվիրակությանը՝ սննդամթերքի անվտանգության վերահսկողության վարչության պետի տեղակալ Խինֆա Դուի գլխավորությամբ: Հանդիպմանը ներկա էին Հայաստանում ՉԺՀ դեսպանության առեւտրատնտեսական խորհրդական Վանգ Հոնգլիանգը, ինչպես նաեւ ՍԱՊԾ պաշտոնյաներ:
Չինաստանի գործընկեր կառույցի պատվիրակության այցի նպատակն է տեղում ծանոթանալ հայկական մեղրի եւ մեղվաբուծական մթերքի արտադրության պայմաններին ու որակին՝ հեռանկարում ունենալով դրանք Չինաստան ներկրելու ծրագիր: Ծառայության պետ Իշխան Կարապետյանը, ողջունելով հյուրերին, կարեւոր է համարել սննդամթերքի անվտանգությունն ապահովող երկու երկրների լիազոր մարմինների միջեւ փոխգործակցությունն ու մասնագետների միջեւ շփումները՝ առանձին խմբերի ապրանքների արտահանմանը խթան հանդիսանալու տեսանկյունից: Նա նաեւ նկատել է, որ Հայաստանն ունի ոչ միայն մեղրի, այլ նաեւ սննդամթերքի այլ տեսակների արտահանման մեծ ներուժ եւ արտաքին շուկայում մրցունակ ու անվտանգ արտադրանք:
Հանդիպմանը քննարկվել են երկու երկրների ներկրման եւ արտահանման ընթացակարգերը, ինչպես նաեւ սննդամթերքի անվտանգության ոլորտում վերահսկման մեխանիզմները: Նախանշվել են նաեւ առաջիկա օրերին համատեղ աշխատանքի ուղղություններն ու ժամանակացույցը: