Եթե այն մարդիկ, որոնք մեզ առերես ասում են, որ մեր օգտին են քվեարկելու, եթե գոնե կեսը մեր օգտին քվեարկի, ապա մենք ընտրություններում հաղթում ենք: Այս մասին, այսօր՝ մարտի 27-ին, Արարատի մարզում քարոզարշավի ժամանակ, լրագրողների հետ զրույցում նշել է «Ելք» դաշինքի ցուցակի 3-րդ հորիզոնականը զբաղեցնող Նիկոլ Փաշինյանը:
Նրա խոսքով, քարոզարշավի ընթացքում տանիքներին բարձրանալը մարդկանց համար շատ ավելի լսելի դառնալու անհրաժեշտությամբ է պայմանավորված. «Դա օգնում է նաեւ, որ ձայնալարերի օգտագործումը որոշ տոկոսով կրճատենք, այսինքն եթե 4 շենքի համար առանձին պետք է խոսեի, ապա տանիքների օգնում են միանգամից ուղիղ կապի դուրս գալ»:
«Ելք» դաշինքի 2-րդ հորիզոնականը զբաղեցնող Արամ Զ. Սարգսյանն էլ նշեց. «Ես չեմ կարողանում բարձրախոսով խոսել, ես ավելի շատ ելույթի մարդ եմ, հանրահավաքների, միտինգների, նիստերի եւ հարցազրույցներն են իմը: Քանի որ Նիկոլն է այդ ամենում լավը, ինչպես ասում են, եթե ամենալավ մորթ անողը Ռեվազն է, բա ինչի ես անեմ»:
Նրա խոսքով, Արարատի մարզում իրենց քարոզարշավի ակնկալիքները մեշ են. «Մենք այստեղ ունենք շատ լավ թեկնածուներ, թե երիտասարդների մեջ, թե նախկինում ընտրություններին մասնակցած թեկնածուների, որոնք մինչեւ 12.000 ձայն են հավաքել եւ կարծում եմ, որ մենք լավ թիմ ունենք ու լուրջ հաջողությունների կհասնենք այս ընտրություններում»: