Մոսկվայի Տվերսկոս շրջանային դատարանը 15 օրով կալանավորել է Ալեքսեյ Նավալնուն, հայտնում է «Դոժդ»-ը ։ Նավալնում մեղավոր են ճանաչել ոստիկանի օրինական կարգադրությանը չհնազանդվելու մեջ։ Մինչ այդ դատարանը քաղաքական գործչին տուգանել էր 20 հազար ռուբլով՝ ոչ հանրային միջոցառում կազմակերպելու համար։
Դատական նիստի ժամանակ Նավալնին խնդրել էր դատարան կանչել վարչապետ Դմիտրի Մեդվեդեւին։ «Ես ուզում եմ դատարան կանչել երեկվա հանրահավաքի իրական կազմակերպչին։ Նա կկարողանա բացատրել, թե ինչու էին այդքան շատ մարդիկ դուրս եկել փողոց»,- ասել էր Նավալնին։
Նավալնուն ձերբակալել են նախօրեին կոռուպցիայի դեմ չարտոնված հանրահավաքի ժամանակ, որին մասնակցել է 7-8 հազար մարդ։ Ձերբակալվածների թիվը գերազանցում է հազարը։
Ռուսաստանի շատ քաղաքներում ակցիաների անցկացման համար առիթ էր դարձել Նավալնու հիմնադրամի հետաքննությունը վարչապետ Դմիտրի Մեդվեդեւի մասին, որը վստահեցնում է, որ Մեդվեդեւը դրածո վստահված անձանց ու հիմնադրամների միջոցով մի քանի առանձնատուն ունի Ռուսաստանում, նաեւ առագաստանավեր, ագրոհամալիրներ ու գինու գործարաններ Ռուսաստանում ու Իտալիայում։