Մենք հույս ունենք, որ մոտ ապագայում, բայց ոչ մեկ ամիս հետո, Հայաստանի եւ Ադրբեջանի ԱԳ նախարարները կարող են հանդիպել Մոսկվայում կամ որեւէ այլ վայրում, որ նախապատրաստեն նախագահների հանդիպման հիմքը: Մարտի 27-ին՝ լրագրողների հետ հանդիպման ժամանակ այս մասին ասաց ԵԱՀԿ Մինսկի խմբի ամերիկացի համանախագահի ժամանակավոր պաշտոնակատար Ռիչարդ Հոգլանդը՝ պատասխանելով NEWS.am-ի այն հարցին, թե կոնկրետ պայմանավորվածություն կա՞ կապված բարձր մակարդակով հանդիպման կազմակերպման հետ:
Նրա խոսքով՝ ԵԱՀԿ Մինսկի խմբի համանախագահները, ներառյալ իրենց երկրների քաղաքական ղեկավարությունը, մշտապես աշխատում են ճիշտ պայմաններ գտնելու շուրջ, որպեսզի ԱԳ նախարարները կամ նույնիսկ նախագահները մեկ սեղանի շուրջ նստեն: «Ներկայումս գործընթացը ընթանում է, եւ դա գաղտնիք չէ: Դուք գիտեք, որ երկու նախարարներն էլ առանձին-առանձին Մոսկվայում հանդիպել են: Մենք հույս ունենք, որ մոտ ապագայում ԱԳ նախարարները կկարողանան հանդիպել Մոսկվայում կամ որեւէ այլ վայրում, որպեսզի նախապատրաստեն նախագահների հանդիպման հիմքը»,- ասաց Հոգլանդը:
Ի պատասխան NEWS.am-ի այն հարցին, թե բանակցային գործընթացի վերականգնման հեռանկարներ տեսնո՞ւմ է՝ հաշվի առնելով Բաքվի շարունակվող ռազմական հռետորաբանությունը եւ հիմնախնդրի խաղաղ կարգավորումից հրաժարվելը, Ռիչարդ Հոգլանդը նշեց. «Դա դիվանագիտական գործընթացի մասն է: Մեր, որպես համանախագահների, աշխատանքը տվյալ պահին այն է, որ խոսում ենք բոլոր խաղացողների հետ: Իսկ վաղը կլինենք Լեռնային Ղարաբաղում, Ստեփանակերտում կհանդիպենք Ղարաբաղի իշխանությունների հետ, ցանկանում ենք համոզված լինել, որ բոլորը տեղյակ են, թե ինչ տարբերակներ կան, քանի որ բանակցությունները վերականգնելու պահը եկել է: Մենք չենք կարող թույլ տալ, որ բռնությունը դառնա այս «թեժ» հարցի լուծումը: Բռնությունը պատասխան չէ: Բռնությունը ընտանիքներ է կործանում, բռնությունը վնաս է պատճառում տնտեսությանը»: