Անվանի դերասան Լորենց Առուշանյանի հոգեհանգստի արարողությունը տեղի կունենա մարտի 28-ին, ժամը 18:00-20:00-ն, Նոր Նորքի 5-րդ զանգվածի Ս. Սարգիս եկեղեցում: Վերջին հրաժեշտը` մարտի 29-ին, ժամը 12:00-14:00-ն, Գ. Սունդուկյանի անվան ազգային ակադեմիական թատրոնում: Հուղարկավորությունը` ՀՀ Կոտայքի մարզի Մայակովսկի գյուղի գերեզմանատանը:
ՀՀ ժողովրդական արտիստ, Գ. Սունդուկյանի անվան ազգային ակադեմիական թատրոնի դերասան Լորենց Առուշանյանը մահացել էր մարտի 26-ին, 82 տարեկան հասակում:
Լորենց Սուլեյմանի Առուշանյանը ծնվել է 1935 թվականի հուլիսի 6-ին: 1953-57 թթ. սովորել է Երեւանի գեղարվեստաթատերական ինստիտուտի դերասանական ֆակուլտետում՝ Վավիկ Վարդանյանի արվեստանոցում: Ավարտելուց հետո շուրջ 5 տարի աշխատել է Լենինականի Մռավյանի անվան պետական դրամատիկական թատրոնում, այնուհետեւ` Երեւանի Ստանիսլավսկու անվան ռուսական դրամատիկական թատրոնում: 1964 թվականից աշխատել է Գ. Սունդուկյանի անվան ազգային ակադեմիական թատրոնում:
Լորենց Առուշանյանը առաջին իսկ բեմելով դրսեւորեց բացառիկ տաղանդը: Մտավորականի, ազնվագույն մարդու իր մեղմ, զուսպ եւ կիրթ կերպարով, նա հաջողեց բեմում եւ կինոյում` կերպավորումներում անմահանալով որպես ներքին փոթորկումների եւ ապրումների դերասան, ինչը բացառիկ շնորհ է մեր արտիստական աշխարհում:
Թատրոնում եւ ֆիլմերում խաղացած դերերից աչքի են ընկել իշխան Միշկինը (Դոստոեւսկի «Ապուշը»), Վասիլը (Հարությունյան «Ղազարը գնում է պատերազմ»), Մոորը (Շիլլեր «Ավազակներ»), Կասիոն (Շեքսպիր «Օթելլո»), Ադամյանը (Հարությունյան «Խաչմերուկ»), Մորգենթաունը (Զեյթունցյան «Ոտքի, դատարանն է գալիս»), Վանահայրը (Շանթ «Հին աստվածներ»), Գաեւը (Չեխով «Բալի այգին»), Բոկան (Նիկոլայի «Վերադարձ Սորենտո»), Տեր Հայկազուն (Վերֆել «Մուսա Լեռան 40 օրը»), «Նվագախմբի տղաները», «Ջրհորի մոտ», «Այդ քաղցր բառը՝ ազատություն», «Ամեն ինչ նորից»: Նշանակալից դերեր է կերտել նաեւ հեռուստաթատրոնում:
1957 թվականից Հայաստանի թատերական գործիչների միության անդամ է: 1984 թվականին նրան շնորհվել է ՀԽՍՀ վաստակավոր արտիստի կոչում, իսկ 2003 թվականին` ՀՀ ժողովրդական արտիստի կոչում:
Լորենց Առուշանյանը իր ուրույն հետքը թողեց հայ թատերարվեստում:
Նրա պայծառ հիշատակը երկար կմնա գործընկերների, մտերիմների, թատերասեր հասարակության սրտերում:
ՀՀ վարչապետի որոշմամբ ստեղծվել է Լորենց Առուշանյանի հուղարկավորության կազմակերպման կառավարական հանձնաժողով:
