Տվյալ պահին Արցախի հարցի շուրջ բանակցային սեղանին համընդհանուր ծրագիր կա, բայց ես այն «Լավրովի ծրագիր» չէի անվանի։ Այս մասին մարտի 27-ին լրագրողների հետ հանդիպման ժամանակ հայտարարել է ԵԱՀԿ Մինսկի խմբի ամերիկյան համանախագահ Ռիչարդ Հոգլանդը՝ պատասխանելով այն հարցին, թե արդյոք գոյություն ունի, այսպես կոչված, «Լավրովի ծրագիրը», եւ ինչպիսին են դրա մանրամասները։
Նրա խոսքով՝ քննարկվում է 3 մասից բաղկացած ծրագիրը։ «Տեղին չի լինի, եթե ես ներկայացնեմ այդ ծրագրի մանրամասները։ Այդ ծրագրի վերաբերյալ բանակցություններ վարող երկու կողմերն էլ դեռեւս պետք է աշխատեն առանձին հարցերի շուրջ։ Եւ դիվանագիտության մեջ, ինչպես խաղում, հնարավոր չէ սեղանին դնել բոլոր խաղաքարտերը։ Հնարավոր է, ծրագրի ինչ-որ մի հատված փոփոխվի, հենց այդ պատճառով մենք չենք խոսում մանրամասների մասին», - հավելել է Ռիչարդ Հոգլանդը։