Սարի թաղում հուլիսի 19-ի դեպքերով հարուցված քրեական գործի շրջանակում կալանավորված 10 բանտարկյալների հարազատների կողմից իրականացվող նստացույցը դադարեցվել է: Այս մասին NEWS.am-ի հետ զրույցում նշեց Հրաչ Բայաջյանի կինը՝ Նարինե Ղազարյանը:
Նրա խոսքով` նստացույցը դադարեցվել է, քանի որ կանանցից մեկը իրեն վատ է զգացել:
«Սարգիս Արաբաջյանի մայրն է վատացել, ճնշումը բարձրացել է, բարձրացել ենք Սարի թաղ, բայց մենք հետագայում մտադիր ենք շարունակել նստացույցը»,-ասաց նա:
Նշենք, որ մարտի 28-ին Սարի թաղի գործով կալանավորված 10 բանտարկյալների հարազատները նստացույց էին հայտարարել:
Հիշեցնենք, որ ըստ մեղադրական եզրակացության՝ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն, Էդուարդ Զեյթունյանը ու Կարեն Վանոյանը 2016թ. հուլիսի 19-ին ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ: Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով: Բոլորն էլ կալանավորված են:
Կալանավորվածների հարազատները մինչդեռ պնդում են՝ նրանք ընդամենը պահանջել են, որ իրենց հոսանքն ու ջուրը միացնեն, բացեն փակ ճանապարհները:
