Շոտլանդիայի խորհրդարանի պատգամավորները կողմ են քվեարկել տարածաշրջանի անկախության մասին նոր հանրաքվեի անցկացմանը։Շոտլանդական ազգային կուսակցության ու դրա առաջնորդի՝ շոտլանդական կառավարության ղեկավար Նիկոլա Սթերջենի նախաձեռնությանն աջակցել է 69 պատգամավոր, դեմ է քվեարկել 59-ը։

Հանրաքվեի անցկացմանը կողմ է քվեարկել ՇԱԿ-ն ու նրանց աջակցող «կանաչները», իսկ դեմ՝ լեյբորիստները, լիբերալ դեմոկրատներն ու պահպանողականները։ Այսպիսով Նիկոլա Սթերջենը խորհրդարանի կողմից լիազորվել է բանակցել Լոնդոնի հետ, առանց որի համաձայնության չի կարելի անցկացնել իրավաբանական ուժ ունեցող հանրաքվե։ Սթերջենի կարծիքով հանրաքվեն պետք է կայանա 2018 աշուն-2019-ի գարուն ժամանակահատվածում։

Անկախացման մասին երկրորդ հանրաքվեի անցկացման հնարավորության շուրջ բանավեճերը խորհրդարանում սկսվել էին դեռ մարտի 21-ին։ Սթերջենը համարում է, որ ԵՄ-ից Մեծ Բրիտանիայի դուրս գալը որակապես նոր իրավիճակ է ստեղծում։

Մեծ Բրիտանիայի վարչապետ Թերեզա Մեյը կտրականապես դեմ է, որ մինչեւ «Բրեքսիթի» գործընթացի ավարտը Շոտլանդիայի անկախացման մասին երկրորդ հանրաքվե անցկացվի։ 2014-ին անկախության մասին առաջին հանրաքվեի ժամանակ շոտլանդացիների մեծ մասը կողմ է արտահայտվել, որ ռեգիոնը մնա Մեծ Բրիտանիայի կազմում։ Իսկ 2016-ին Բրեքսիթի մասին քվեարկության ժամանակ Շոտլանդիայի բնակիչների մեծ մասը կողմ է արտահայտվել ԵՄ-ում Լոնդոնի անդամակցությունը պահպանելուն։