Եթե աշխարհը չաջակցի փախստականներին, դա ըստ էության նշանակում է, որ աշխարհն օգնում է ԻՊ-ի ու «Ալ Կաիդայի» նմաններին։ Այս մասին ՄԱԿ-ի գլխավոր քարտուղար Անտոնիու Գուտերեշը հայտնել է Հորդանանում Զաաթարի փախստականների ճամբարն այցելելուց հետո։ Գուտերեշը կոչ է արել փախստականներին չթողնել ճակատագրի քմահաճույքին ու չմոռանալ ահաբեկչության գլոբալ սպառնալիքի մասին։
ՄԱԿ ղեկավարի խոսքով, փախստականների առաջ ավելի ու ավելի շատ դռներ են փակվում, նրանք հնարավորությունները ավելի են քչանում։ «Փախստականներին չաջակցելով՝ աշխարհն ըստ էության աջակցում է ԻՊ-ին ու «Ալ Կաիդային»։ Նրանք այդ փաստարկն օգտագործում են նորանոր մարդկանց իրենց կողմը գրավելու համար»,- ասել է նա։
Գուտերեշը շեշտել է, որ փախստականներին աջակցելը զուտ մարդասիրական դրսեւորում չէ։ Միջազգային համայնքի համար դա նաեւ սեփական շահերի պաշտպանություն է։ Չէ՞ որ ահաբեկչությունը գլոբալ սպառնալիք է։