Մոսուլի արեւմտյան մասը ԻՊ-ից ազատագրելու գործողությունը վերածվել է «մսաղացի» քաղաքացիական բնակչության համար՝ կոալիցիայի ուժերը ռմբակոծում են բնակելի թաղամասերը օդից, ԻՊ զինյալները մարդկանց սպանում են ցամաքում։ ՄԱԿ մարդու իրավունքների գերագույն հանձնակատար Զեյդ Ռաադ ալ- Հուսեյնը պահանջել է ապահովել Մոսուլի խաղաղ բնակիչների պաշտպանությունը։
Միայն մարտի 17-22 ժամանակահատվածում Մոսուլի արեւմտյան մասում առնվազն 307 խաղաղ բնակիչ է զոհվել, եւս 273-ը վիրավորվել։ Դրանք հաստատված տվյալներ են։
Իրաքի զորքերը ու նրանց օգնող միջազգային կոալիցիայի ուժերը սկսել են հետաքննել քաղաքացիական բնակչության զանգվածային սպանությունների դեպքերը։ ՄԱԿ գերագույն հանձնակատարը ողջունել է հետաքննության փաստը։
«Ինչ վերաբերում է միջազգային կոալիցիայի կողմից օդային հարվածներին, ապա դրանք իհարկե զոհերի պատճառ են դարձել խաղաղ բնակչության շրջանում,- ասել է Գերագույն հանձնակատարի ներկայացուցիչը՝ պատասխանելով լրագրողի հարցին,- Սակայն մեզ հայտնի է, որ ԻՊ զինյալները տներում պայթուցիկ սարքեր են տեղադրում, որոնք գործի են դրվում, երբ դրանց վրա լիցք է ընկնում՝ դրանով իսկ ուժեղացնելով կործանարար էֆեկտը։ Այնպես որ սա բարդ հարց է»։
