ԱՄՆ պետքարտուղար Ռեքս Թիլերսոնը պնդելու է, որ ՆԱՏՕ-ում ԱՄՆ դաշնակիցները ցույց տան «հստակ ուղի» դեպի պաշտպանական ծախսերի ավելացում։ Այս մասին հայտնում է Reuters–ը՝ վկայակոչելով Պետդեպարտամենտի ներկայացուցչին։
Թիլերսոնը մարտի 31-ին Բրյուսելում մասնակցելու է ՆԱՏՕ-ի արտգործնախաարների հետ հանդիպմանը։
Չինովնիկի խոսքով՝ Թիլերսոնը դաշնակիցներին կդրդի ներկայացնել ծրագիր՝ պաշտպանական ծախսերը ՀՆԱ 2 տոկոսի չափով ավելացնելու մասին, նաեւ կպնդի, որ Դաշինքը ավելի մեծ դեր կատարի ահաբեկչության դեմ պայքարում։ «ԱՄՆ-ն այլեւս չի կարող ընդունել ՆԱՏՕ-ի ծախսերի անհամաչափ մասնաբաժինը՝ զսպման ու պաշտպանության ծախսերում»,- ասել է չինովնիկը լրագրողների հետ ճեպազրույցում՝ անանունության պայմանով։