Քաղաքական ահաբեկչություն է կատարվում, լրատվական ուղղորդված տեռոր է տեղի ունենում տարբեր գործիչների ու ՀԿ-ների կողմից ուղղորդված: Այս մասին, այսօր՝ մարտի 29-ին, լրագրողների հետ հանդիպման ժամանակ նշել է ՀՀԿ մամուլի խոսնակ Էդուարդ Շարմազանովը՝ անդրադառնալով 114 դպրոցների եւ մանկապարտեզների տնօրենների կողմից ՀՀԿ օգտին ցուցակագրումներ անելու եւ դրանք մարզպետարաններին ու քաղաքապետարաններին փոխանցելու վերաբերյալ սկանդալային ձայնագրություններին:
Նրա խոսքով, ձայնագրությունների հետ կապված ՀՀԿ-ն հստակ օպերատիվ արձագանքել է. «Ես ստորագրում եմ բոլոր այդ հիմնավորումների տակ: Մնացածն իրավական մարմինների անելիքն է: Բայց այն աժիոտաժը, այն լկտի պահվածը, որ եղել է մեր գործիչների, այդ թվում քաղաքական գործիչների կողմից, կարծում եմ անթույլատրելի է: Այս գործընթացում եղել են գործիչներ, որոնք իրենց պարկեշտ չեն պահել կանանց նկատմամբ:
Եթե տնօրենների մասին է խոսքը, ապա ո՞վ է բարոյական իրավունք տվել այդ տնօրեններին վիրավորել, կա անմեղության կանխավարկած: Կարծում եմ՝ կարիք չկա մի քանի ձայն ավել հավաքելու համար մորդ, քրոջդ կամ կնոջդ տարիքի մարդկանց վիրավորել: Դա հայ տղամարդուն հարիր չէ: Ես հասկանում եմ, որ որոշ մարդիկ նյարդայնացել են չգիտես ինչու: Եթե օրենք է խախտվել, կա դատախազություն, կդիմեք, թող պատժեն: Եթե նույնիսկ այդ ձայնագրություններ իրականություն են, կա հոդված: Երկրորդ, պետք է պարզվի՝ այդ մարդիկ աշխատանքի ժամին են արել, պարտականությունները չարաշահել են, թե ոչ: Ինձ համար կրկնակի անընդունելի է, որ մարդիկ, որոնք հավակնում են ունենալ ժողովրդի մանդատը հաջորդ ԱԺ-ում, աշխարհի անթույլատրելի բառերմ ասում են»,-ասաց Շարմազանովը:
Հիշեցնենք, որ «Իրազեկ քաղաքացիների միավորում» ՀԿ-ն հրապարակել է 114 դպրոցների եւ մանկապարտեզների տնօրենների հետ ձայնագրություններ, որտեղ նրանք խոստովանում են, որ ՀՀԿ-ի օգտին ցուցակագրումներ են իրականացրել եւ դրանք փոխանցել մարզպետարաններ, քաղաքապետարաններ ու վարչական շրջանների աշխատակազմեր:
