«Ազատ դեմոկրատներ» կուսակցությանը հաջողվեց իր ծրագրային ուղերձները հասցնել ընտրողներին: Այս մասին այսօր՝ մարտի 29-ին, լրագրողների հետ հանդիպման ժամանակ նշել է «Ազատ դեմոկրատներ» կուսակցության ցուցակի 4-րդ հորիզոնականը զբաղեցնող Անահիտ Բախշյանը: «Տեղեր կան, որ քաղաքացիները լսում են քեզ եւ ուզում են ընտրել ծրագիր, որ քո քաղաքական ուժի միջոցով բարձրաձայնեն իրենց խնդիրը խորհրդարանում: Տեղեր կար, ոգեւորիչ էր, տեղեր կար՝ ոչ, բայց մենք կարողացանք մեր ուղերձը հասցնել ընտրողին՝ այն է գալիս ենք փոխելու ՀՀ ուղղությունը դեպի եվրոպական ընտանիք»,-ընդգծեց Անահիտ Բախշյանը:
Նախկին պատգամավորի խոսքով՝ երկրորդ կարեւոր ուղերձը բյուջեի ու ՏԻՄ կառավարման հետ կապված նախկին վարչապետ Հրանտ Բագրագյանի թեզերն էին, որոնք հավանության էին արժանանում շատ համայնքներում:
Անահիտ Բախշյանը շեշտեց, որ իր ուղերձը կրթական համակարգի ապաքաղաքականացումն ու ուսումնական կենտրոնների ապակենտրոնացումն է, որ չլինեն այնպիսի խայտառակ դեպքեր, ինչպես եղան վերջին բացահայտումները ընտրողներին ցուցակագրելու առումով:
«Տնօրենին պիտի ասվի՝ իրավունք չունես ուսուցչին, աշակերտի ծնողին թելադրել քո կամքը՝ թե ում ընտրեն»,-ասաց դպրոցի նախկին տնօրեն Անահիտ Բախշյանը:
