Տեղեկատվական տեխնոլոգիաների ոլորտի 10 հայկական սթարթափ նախագծեր նոր ներդրումային ծրագրի շրջանակում ֆինանսավորում կստանան: Նախագծի նպատակն է՝ ֆինանսական աջակցություն ցուցաբերել նոր եւ լավ բիզնես գաղափարներ ունեցող, բայց դրանց իրականացման համար միջոցներ չունեցող ընկերություններին: Այս մասին մարտի 29-ին լրագրողների հետ հանդիպմանն ասաց ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը:
Նրա խոսքով՝ այս գաղափարը պատկանում է «Global Credit» եւ «Ռենեսա» կազմակերպություններին: Մրցույթի արդյունքում նրանք կընտրեն 10 սթարթափ, որոնք կարող են ընդհանուր 200 հազար դոլարի ֆինանսավորում ստանալ, յուրաքանչյուրը՝ 20 հազար դոլար: Բացի այդ՝ նրանց կառաջարկվի մենթորային եւ հաշվապահական աջակցություն, որը թույլ կտա ոտքի կանգնեցնել նախագիծը եւ դրանից եկամտաբեր բիզնես ստանալ:
Գաղափարի հեղինակներ Էդվարդ Մարությանն ու Արա Յաղջյանն իրենց հերթին նշեցին, որ ֆինանսավորող կազմակերպությունները կստանան սթարթափ ընկերությունների բաժնետոմսերի մի մասը: Եթե վերջինները հաջողության հասնեն, դա նաեւ ներդրողների համար շահավետ կլինի:
Մրցույթին մասնակցելու հայտ կարող են ներկայացնել տեղեկատվական տեխնոլոգիաների ոլորտի բոլոր սկսնակ եւ գործող ընկերությունները, ինչպես նաեւ զբոսաշրջության եւ գյուղատնտեսության ոլորտներում նորարարություններ առաջարկող ընկերությունները:
Մրցույթը մեկնարկել է մարտի 23-ին եւ կշարունակվի մինչեւ ապրիլի 13-ը: Նախագծերը կընտրի 12 մասնագետից կազմված հանձնաժողովը:
Էդվարդ Մարությանն ու Արա Յաղջյանը հույս հայտնեցին, որ ապագայում հնարավոր է Հայաստանում սթարթափերի մասշտաբային ֆինանսավորման համար մեծ հիմնադրամ ստեղծել:
