Երեւանի բնակչի կողմից պապի նկատմամբ ավազակային հարձակում կատարելու դեպքի առթիվ հարուցված քրեական գործի նախաքննությունն ավարտվել է:
Քննչական կոմիտեի տարածած հաղորդագրության համաձայն, նախնական քննության տվյալներով՝ 2016թ. նոյեմբերի 1-ին ժամը 08:00-ի սահմաններում Երեւանի բնակիչ, 31-ամյա Ա.Հակոբյանը մուտք է գործել պապի բնակարան, բազմաթիվ հարվածներ հասցրել նրա գլխի եւ դեմքի շրջանում: Այնուհետեւ երիտասարդը հափշտակել է պապի մոտ առկա կանխիկ գումարը, նրա բջջային հեռախոսը եւ դիմել փախուստի։
Ձեռք բերված ապացույցների համակցությամբ՝ Ա.Հակոբյանին մեղադրանք է առաջադրվել Քրեական օրենսգրքի 175-րդ հոդվածի 1-ին մասով (ուրիշի գույքը հափշտակելու նպատակով հարձակումը, որը կատարվել է կյանքի կամ առողջության համար վտանգավոր բռնություն գործադրելով):
Քրեական գործը մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին:
