Սարի թաղում հուլիսի 19-ի դեպքերով հարուցված քրեական գործի շրջանակում կալանավորված Էդուարդ Զեյթունյանը շարունակում է մարտի 24-ից սկսած հացադուլը: Այս մասին NEWS.am-ը տեղեկացավ նրա կնոջից՝ տիկին Լալայից: Նա նշեց, որ հացադուլից 5 օր անց իր ամուսնուն բժշկական օգնություն չի ցուցաբերվել եւ իր նրա վիճակը ավելի է վատացել:
«Ասում են, եթե պետք է՝ ձեր բժշկին բերեք, թող հետազոտի: Բայց դա իրենց պարտականությունն է իմ ամուսնուն բուժօգնություն ցույց տալը, ես ի՞նչ միջոցներով դա կազմակերպեմ»,-ասաց նա:
Տիկին Լալան նշեց, որ իր ամուսինը խնդիրների ունի սրտի, թոքերի եւ ճնշման հետ կապված եւ հացադուլն ավելի է վատացնում նրա առողջական վիճակը:
Հիշեցնենք, որ ըստ մեղադրական եզրակացության՝ Սարի թաղի բնակիչներ Հարություն Թորոսյանը, Հրայր Իսախանյանը, Անդրանիկ Քյոսեյանն, Էդուարդ Զեյթունյանը ու Կարեն Վանոյանը 2016թ. հուլիսի 19-ին ժամը 20.00-ի սահմանում Մովսես Խորենացի փողոցին հարող` Գլինկա եւ Որմնադիրների փողոցների հատման վայրում մի խումբ անձանց հետ, առողջության համար վտանգավոր բռնություն են գործադրել իրենց ծառայողական պարտականությունները կատարող, իշխանության ներկայացուցիչ համարվող ՀՀ ոստիկանության մի շարք ծառայողների նկատմամբ: Նրանց մեղադրանք է առաջադրվել Քրեական օրենսգրքի 316-րդ հոդվածի 2-րդ մասով: Բոլորն էլ կալանավորված են:
Կալանավորվածների հարազատները մինչդեռ պնդում են՝ նրանք ընդամենը պահանջել են, որ իրենց հոսանքն ու ջուրը միացնեն, բացեն փակ ճանապարհները: