Այս ընտրարշավի ժամանակ ապացուցվեց, որ քաղաքական ուժերը մեկը մյուսին վերարտադրելով, այսքան տարիներ, 2000-ից սկսած նույն երգը երգելով, նույն ջեմն ու պահածոն բաժանելով փորձել են սողոսկել մարդկանց տները, հիմնավորելով, որ իրենք ընդդիմադիր են, իսկ ընտրությունից հետո մտել են կոալիցիա: Այս մասին, այսօր՝ մարտի 30-ին, «Ելք» դաշինքի երթ-հանրահավաքի ժամանակ հայտարարել է դաշինքի ցուցակի 2-րդ հորիզոնականը զբաղեցնող Արամ Զ. Սարգսյանը:
Նրա խոսքով, վերջին շրջանում որոշակի լրատվամիջոցներով փորձում են տարածել, որ ՀՀԿ-ն ու «Ծառուկյան» դաշինքը համաձայնության են եկել ու քվոտավորել իրենք քվեները. «Հետաքրքիրն այն է, որ ԲՀԿ-ն որեւէ կերպ չի անդրադառնում դրան, չի ասում՝ այդպես է, թե ոչ: Դրան չի անդրադառնում նաեւ ՀՀԿ-ն: ՀՀԿ փոխնախագահ Արմեն Աշոտյանը հայտարարում է,որ իրենք մրցակից են իրար մեջ ինչպես Հոլիվուդն ու Բոլիվուդը: Ախր, այ պարոն Աշոտյան ջան, Բրյուս Ուիլիսի սանրվածքն ունենալը դեռ չի նշանակում Հոլիվուդից լինել: Դուք երկուսդ էլ Բոլիվուդից եք, դուք Զիտան եւ Գիտան եք, պարզվելու է, որ հարազատ քույրեր եք, նույն հորից ու մորից:
Այն, ինչ տեսանք այս ընտրարշավի ժամանակ ապացուցեց, որ քաղաքական ուժերը մեկը մյուսին վերարտադրելով, այսքան տարիներ 2000-ից սկսած նույն երգը երգելով, նույն ջեմն ու պահածոն բաժանելով փորձել են սողոսկել ձեր տները: Ընտրությունից ընտրություն հիմնավորելով, որ իրենք ընդդիմադիր են, ընտրությունից հետո մտել կոալիցիա: Հասել է ժամանակ, որ նրանց ոչ ասենք, որովհետեւ կուսակցությունները շատ են, իսկ ելքը՝ մեկը»:
