Ձեր ձայնը մի տվեք այնպիսի ուժերի, որոնք հետ էլի դառնալու են հանրապետական: Այս մասին, այսօր՝ մարտի 30-ին, «Ելք» դաշինքի երթ-հանրահավաքի ժամանակ հայտարարել է դաշինքի ցուցակը գլխավորող Էդմոն Մարուքյանը:
Նրա խոսքով, բոլոր այն ուժերը, որոնք եղել են կոալիցիաների մեջ՝ «Ծառուկյան» դաշինք, ՕԵԿ, ՀՅԴ, ՀՀԿ, նրանց բոլորի ձայնը նույն տեղն է գնում. «համակարգին այլընտրանք կարող է լինել այն ուժը, որը տարբեր է այդ համակարգից: Չի կարող նույն մարդկանցից բաղկացած ուժը լինել այլընտրանք: Դա «Կոկա կոլայի» եւ «Պեպսի կոլայի» պես բան է, սեւ բան է, մակ մեկն ես խմում, կամ՝ մյուսը: նույն սեւ, թունավոր բանն է:
Նա կոչ արեց քվեարկել «Ելք» դաշինքի օգտին, որպես իրական այլընտրանք, որպես իրական ընդդիմություն:
Անդրադառնալով հետընտրական գործընթացներին, Մարուքյանը նշեց. «Մեզ հարցնում են, թե երբ «Ելք» դաշինքը կսկսի հետընտրական գործընթացներ: Մենք շատ հանգիստ քարոզարշավ ենք իրականացնել, բայց եթե մեր վստահված անձանց մեկի գլխից մի մազ պակասի, եթե այդ օրը մեկի նկատմամբ բռնություն կիրառվի, եթե իմանանք, որ «Ելք» դաշինքի 0,001 ձայն կորել է կամ դրել են մեկ այլ քվեաթերթիկի վրա, ապա այնպիսի հետընտրական պրոցեսներ կտեսնեք, էնպիսի բողոքի ակցիաներ կտեսնեք, էնպիսի իրավական, քաղաքական պրոցեսներ կտեսնեք, որ երեւի երբեւէ չի եղել»:
