Արցախում պայմանագրային զինծառայող է զոհվել: Հակառակորդի կողմից հրադադարի խախտման հետեւանքով մահացու վիրավորում է ստացել 1993 թվականին ծնված Գոռ Գեւորգի Հովհաննիսյանը:
Նա Արցախի Կովսական քաղաքից էր, նրա ընտանիքը հիմա Մարտունիում է բնակվում: 24-ամյա Գոռ Հովհաննիսյանը Վազգեն Սարգսյանի անվան ռազմական ինստիտուտի շրջանավարտ է: Ընտանիքի ավագ զավակն էր, երկու կրտսեր եղբայր ունի, որոնցից մեկը ժամկետային զինծառայող է:
Նախընտրական քարոզարշավի ավարտին մի քանի ժամ է մնացել. ուղիղ կեսգիշերից Հայաստանում «լռության օր» կսկսվի: Քաղաքական ուժերը մարտի 5-ից ակտիվ քարոզարշավ անցկացրեցին՝ այցելելով Հայաստանի գրեթե բոլոր քաղաքներ եւ գյուղեր: Այս ընթացքում տեղական եւ միջազգային տարբեր կազմակերպություններ սոցիոլոգիական հարցումներ անցկացրեցին, որոնց արդյունքներում, ընդհանուր առմամբ, մեծ տարբերություններ չկան:
Այդ հարցումների համաձայն՝ այս ընտրություններում առաջատարն ու հիմնական մրցակիցները Հանրապետական կուսակցությունն ու «Ծառուկյան» դաշինքն են, ընդ որում՝ տարածքային թեկնածուների աջակցությունն էլ հաշվի առնելով՝ Հանրապետականն 8-10%-ով կգերազանցի «Ծառուկյան» դաշինքին. այդ դեպքում Հանրապետականը կունենա մինչեւ 44%, «Ծառուկյան» դաշինքը՝ 36% ձայն:
Ընտրություններին մասնակցող մյուս ուժերից, ըստ հարցումների արդյունքների, 6-րդ գումարման Ազգային ժողովում հայտնվելու հնարավորություն ունեն «Ելք» դաշինքը եւ ՀՅԴ-ն: «Ելք» դաշինքը կարող է մինչեւ 9% ձայն ստանալ, ՀՅԴ-ն՝ մինչեւ 7%: Ընտրություններին մասնակցող մյուս կուսակցություններն ու դաշինքները, նախընտրական հարցումների համաձայն, չեն հաղթահարի, համապատասխանաբար, 5 եւ 7%-ի շեմը: Չնայած դրան՝ քարոզարշավի ավարտին քաղաքական բոլոր ուժերը վստահություն էին հայտնում, որ տեղ են ունենալու խորհրդարանում, ավելին, որ մեծամասնություն են կազմելու:
Վերջին օրերին քաղաքական ուժերն ամփոփում էին նախընտրական քարոզարշավը: Որոշները՝ մամուլի ասուլիսներով եւ համակիրների հետ հանդիպումներով, որոշներն էլ՝ հանրահավաքներով եւ երթով: Այսօր քարոզարշավն է ամփոփել նաեւ Հանրապետական կուսակցությունը: Մարզահամերգային համալիրում կայացած հավաքին մասնակցել է նաեւ նախագահ Սերժ Սարգսյանը, որն այս անգամ ակտիվ քարոզարշավին չէր մասնակցում: Իր ելույթում Հանրապետական կուսակցության ղեկավարը հիշեցրել է իրենց կարգախոսը՝ «Անվտանգություն եւ առաջընթաց», հիշեցնելով, որ անվտանգությունը Հայաստանի թիվ մեկ խնդիրն է: Իսկ քաղաքացիներին ուղղված Սերժ Սարգսյանի կոչն էր՝ ապրիլի 2-ին ընտրել իրենց նախընտրած քաղաքական ուժին:
Հանրապետական կուսակցության ներկայացուցիչների ելույթներն այսօր կարճ էին: Իսկ հավաքն ուղեկցվել է համերգային ծրագիր, որի ընթացքում ելույթ են ունեցել նաեւ «Ռեինկարնացիա»-ն ու «Ձախ Հարութը»:
«Օհանյան-Րաֆֆի-Օսկանյան» դաշինքի առաջնորդներն այսօր հանդիպել են լրագրողների հետ, չնայած օրերս քարոզչությունն ամփոփել էին հանրահավաքով եւ երթով: Վարդան Օսկանյանն անդրադարձել է Արցախի հարցով Լեւոն Տեր-Պետրոսյանի հայտարարությանը՝ նշելով, որ դրա հասցեատերը երկրի իշխանություններն են:
Արթուր Բաղդասարյանը նույնպես նախընտրական քարոզչությունն ամփոփել է մամուլի ասուլիսով՝ վստահեցնելով, որ խորհրդարանում ներառված երրորդ քաղաքական ուժն իր գլխավորած «Հայկական վերածնունդ»-ն է լինելու:
Ապրիլի 2-ին խորհրդարանական ընտրություններին կհետեւի շուրջ 650 միջազգային եւ ավելի քան 28 հազար տեղական դիտորդ: Ընտրությունների ընթացքը լուսաբանելու համար նաեւ ավելի քան 100 օտարերկրացի լրագրող է հավատարմագրվել: Ընտրություններին պատրաստվում են հետեւել նաեւ սփյուռքահայ հայտնի գործիչներ: Անցյալ տարվա սեպտեմբերին նրանք «Արդարություն Հայաստանում» նախաձեռնությունն են ստեղծել, որի անդամներից մի քանիսն արդեն Հայաստանում են: Լրագրողների հետ այսօր կայացած հանդիպմանը դերասանուհի Արսինե Խանջյանը վստահություն է հայտնել, որ կարեւոր է յուրաքանչյուր քաղաքացու ձայնը, հակառակ դեպքում՝ չէին փորձի ընտրակաշառք բաժանել:
Սերժ Թանկյանն էլ ասել է, որ այս ընտրություններում իրենք անձնական շահ չունեն, պարզապես ցանկանում են ավելի ժողովրդավար Հայաստան տեսնել: Իսկ կուսակցական պատկանելության մասին հարցին Թանկյանը երգով է պատասխանել:
Հիշեցնենք, որ կեսգիշերից սկսած Հայաստանում արդեն «լռության օր» է՝ մինչեւ ապրիլի 2-ի ժամը 20:00-ն, երբ փակվեն հանրապետության բոլոր ընտրատեղամասերը: Այդ ընթացքում խորհրդարանական ընտրություններին մասնակցող քաղաքական բոլոր ուժերի քարոզչությունն արգելվում է: Իսկ ընտրություններին մասնակցում է 5 կուսակցություն՝ ՀՀԿ-ն, «Հայկական վերածնունդ»-ը, ՀՅԴ-ն, «Ազատ դեմոկրատներ»-ը եւ Հայաստանի Կոմունիստական կուսակցությունը, եւ 4 նախընտրական դաշինք՝ «Ծառուկյան», «Ելք», «Օհանյան-Րաֆֆի-Օսկանյան» եւ «Կոնգրես-ՀԺԿ» դաշինքները: Քվեարկությունը կմեկնարկի ապրիլի 2-ին ժամը 8:00-ին եւ կավարտվի 20:00-ին:
Հայկական «Տարոն-Ավիա» ընկերությունն ապրիլի 25-ից Գյումրու «Շիրակ» օդանավակայանից կանոնավոր եւ չարտերային չվերթեր կիրականացնի: Առայժմ թռիչքներ կիրականացվեն միայն դեպի Ռուսաստան՝ երեք ուղղություններով. Ռոստով, Սամարա, Կրասնոդար: Ընկերությունը, սակայն, ծրագրում է կարճ ժամանակ անց չվերթներ իրականացնել նաեւ դեպի եվրոպական երկրներ: Ավիատոմսերի գները կսկսվեն 10.000 դրամից: Ի դեպ՝ «Տարոն»-ի առաջին օդանավը կկրի Մհեր Մկրտչյանի անունը: Առաջին չվերթը կիրականացվի ապրիլի 25-ին՝ Գյումրի-Կրասնոդար-Գյումրի երթուղով:
«Եվրատեսիլ 2017» միջազգային մրցույթի առաջին կիսաեզրափակիչ փուլում Հայաստանը ներկայացնող Արծվիկը ելույթ կունենա 16 համարի ներքո: Այն նախանշված է մայիսի 9-ին, երկրորդ կիսաեզրափակիչը՝ 11-ին, իսկ եզրափակիչը՝ մայիսի 13-ին: Արծվիկը կներկայանա Fly with me երգով, որի հոլովակը շուրջ 10 օրվա ընթացքում ավելի քան մեկ միլիոն դիտում է ունեցել: Միաժամանակ, եվրատեսիլյան բլոգում քվեարկություն են նախաձեռնել, եւ Արծվիկն այս պահին ոչ միայն լավագույն երգչուհին է, այլեւ գլխավորում է ամենագեղեցիկ կատարողների ցուցակը:
Դոլարն ու եվրոն մարտի 31-ին էժանացել են, ռուբլին կայուն է: Արդյունքում դոլարի փոխարժեքը կազմել է 483 դրամ, եվրոյինը՝ 515, ռուբլունը՝ 8 դրամ 59 լումա, ֆունտինը՝ 601 դրամ:
Ապրիլի 1-ին հանրապետության տարածքում կարճատեւ տեղումներ են սպասվում: Օդի ջերմաստիճանն էապես չի փոխվի: Երեւանում նույնպես վաղը ժամանակ առ ժամանակ տեղումներ կլինեն: Մայրաքաղաքում գիշերը կդիտվի +5+7, ցերեկը՝ +14+16 աստիճան տաքություն: