Հայաստանի խորհրդարանական ընտրություններում քվեարկության գաղտնիությունը ճնշելու փորձեր են արվել։ Այս մասին ապրիլի 3-ին մամուլի ասուլիսի ժամանակ հայտարարել է Եվրոպայի խորհրդի խորհրդարանական վեհաժողովի (ԵԽԽՎ) պատվիրակության ղեկավար Լիլիան Մորի Պասկյեն՝ ներկայացնելով դիտորդական առաքելության արդյունքները։
Նրա խոսքով՝ 2015-ի դեկտեմբերին ընդունված Սահմանադրական բարեփոխումներից հետո ընտրական համակարգը մի քանի կարեւոր քայլեր է կատարել։ Իշխանություններն ընտրողներին տեղեկացրել են նոր օրենսդրության եւ քվարկության ընթացակարգերի մասին։
Նա նշել է, որ օրենսդրական փոփոխությունների ժամանակ հաշվի են առնվել Եվրոպայի խորհրդի վենետիկյան հանձնաժողովի փորձագետների կարծիքը։ Սակայն չնայած իրավական կողմին՝ այդ ընտրությունները չչեզոքացրեցին նախկին կասկածները՝ ընտրական գործընթացի հուսալիության եւ ամբողջականության վերաբերյալ։ Լրատվամիջոցներում արդյունավետ քննարկումներ չեն եղել, իսկ քարոզարշավն ավելի շուտ կենտրոնացված է եղել անձանց, այլ ոչ թե ծրագրերի վրա։